Marathi e-Batmya
सध्याच्या पुणे-शिरुर-अहमदनगर-छत्रपती संभाजीनगर राष्ट्रीय महामार्गाची सुधारणा करण्याचा निर्णय आज झालेल्या मंत्रिमंडळ बैठकीत घेण्यात आला. बैठकीच्या अध्यक्षस्थानी मुख्यमंत्री एकनाथ शिंदे होते.
पुणे ते शिरुर हा ५३ कि.मी. चा मार्ग सहा पदरी उन्नत करण्यात येणार असून एमएसआयडीसीमार्फत हे काम केले जाईल. यासाठी ७ हजार ५१५ कोटी खर्च अपेक्षित आहे. शिरुर अहमदनगर बाह्यवळण रस्ता मार्गे छत्रपती संभाजीनगर हा सध्याचा रस्ता सुधारण्यासाठी २ हजार ५० कोटी रुपये खर्च अपेक्षित आहे.
शिरुर ते अहमदनगर या मार्गामध्ये सार्वजनिक बांधकाम विभागाकडून पथकर वसुली होत आहे. त्यामुळे ही पथकर वसुली संपल्यानंतर हा मार्ग हस्तांतरित करण्यात येईल. अहमदनगर ते देवगड हा रस्ता सुधारण्यासाठी तो एमएसआयडीसीला हस्तांतरित करण्यात येईल. तसेच देवगड ते छत्रपती संभाजीनगर या मार्गांवर सार्वजनिक बांधकाम विभागाकडून पथकर वसुली होत आहे. ती संपुष्टात आल्यानंतर हा मार्ग एमएसआयडीसीला हस्तांतरित करण्यात येईल.
राष्ट्रीय महामार्गासाठी केंद्रीय हायवे-अॅथोरिटी ऑफ इंडिया कडून निधी खर्च करण्यात येत असताना राष्ट्रीय महामार्गासाठी राज्य सरकार का खर्च करत आहे असा सवाल या निमित्ताने उपस्थित करण्यात येत आहे. तसेच रस्ते महामार्गाची नवीन सुधारणा करण्यासाठी ६ हजार कोटी आणि २ हजार कोटी रूपयांची तरतूद करण्याचा निर्णय घेण्यात आल्याने राज्य सरकारकडून इतक्या मोठ्या प्रमाणावर रस्ता सुधारणेसाठी निधी खर्च करणे कितपत योग्य आहे असा सवालही यावेळी उपस्थित करण्यात येत आहे.
