आंध्र प्रदेशचे उपमुख्यमंत्री आणि जनसेना पक्षाचे प्रमुख पवन कल्याण यांनी, त्यांच्या राजकीय प्रवासाची तुलना विजय यांच्या जलद उदयाशी केली जात असताना, आंध्र प्रदेश आणि तामिळनाडूमधील राजकीय परिस्थिती एकाच दृष्टिकोनातून पाहता येणार नाही, असे वक्तव्य केले. विषेश म्हणजे पवन कल्याण हे आंध्र प्रदेशामधील तेलगू चित्रपटसृष्टीतील अभिनेते आहेत. तर तामिळनाडू चित्रपटसृष्टीतील अभिनेते विजय हे आहेत.
मंगलागिरी येथील पक्षाच्या मुख्यालयात जनसेना कार्यकर्त्यांशी बोलताना पवन कल्याण म्हणाले की, विशेषतः तामिळनाडूमध्ये विजय यांच्या नाट्यमय सत्ताप्राप्तीनंतर, २०२४ च्या आंध्र प्रदेश निवडणुकीत जनसेनेने तेलगू देसम पार्टी (टीडीपी) आणि भाजपासोबत युती का केली, असा प्रश्न पक्षाचे कार्यकर्ते आणि समर्थक त्यांना वारंवार विचारत आहेत.
तामिळगा वेट्री कळघम (टीव्हीके) स्थापन केल्यानंतर अल्पावधीतच विजय मुख्यमंत्री झाल्याचा संदर्भ देत पवन कल्याण म्हणाले की, जनसेनेने असाच स्वतंत्र राजकीय मार्ग का स्वीकारला नाही, असा प्रश्न अनेक लोक विचारत आहेत.
“विजय तामिळनाडूमध्ये मुख्यमंत्री झालेले पाहून, आम्ही आंध्र प्रदेशात युतीचा मार्ग का स्वीकारला, असा प्रश्न अनेक जण विचारत आहेत. पण तामिळनाडूची परिस्थिती आंध्र प्रदेशपेक्षा वेगळी आहे,” असे ते म्हणाले.
पवन कल्याण यांनी यावर जोर दिला की, जनसेनाचे राजकीय निर्णय हे निवडणुकीच्या महत्त्वाकांक्षेपेक्षा आंध्र प्रदेशातील विशिष्ट वास्तव आणि वैचारिक विचारांनी प्रेरित होते. “राजकारणाने सामाजिक बदल घडवला पाहिजे, या विश्वासाने मी हा पक्ष सुरू केला. मी एनटीआर यांचा राजकीय प्रवास जवळून पाहिला आणि नक्षलवादाचा काळही अनुभवला, जिथे अनेक तरुणांनी विचारधारेपोटी आपल्या प्राणांचे बलिदान दिले. त्या अनुभवांनी माझ्या विचारांवर खोलवर प्रभाव टाकला,” असे ते म्हणाले.
अभिनेता-राजकारणी पवन कल्याण म्हणाले की, जनसेना केवळ सत्ता किंवा पदे मिळवण्यासाठी कधीच तयार झाली नाही. “माझ्यासाठी पदे किंवा सत्तेपेक्षा विचारधारेला धरून राहणे नेहमीच अधिक महत्त्वाचे होते. याच भावनेने मी हा पक्ष पुढे नेला,” असे सांगितले.
पवन कल्याण यांनी हे देखील मान्य केले की, जनसेनेच्या अनेक कार्यकर्त्यांना अजूनही वाटते की पक्षाने २०२४ मध्ये स्वतंत्रपणे निवडणूक लढवायला हवी होती. “तेलुगू देसमसोबत युती करण्याऐवजी आपण एकट्यानेच लढायला हवे होते, असे तुमच्यापैकी अनेकांना आजही वाटते. आमच्या कार्यकर्त्यांकडून मला हे वारंवार ऐकायला मिळते,” असे ते म्हणाले.
मात्र, पवन कल्याण यांनी टीडीपी आणि भाजपासोबतच्या युतीचे समर्थन केले आणि सांगितले की, त्यांनी हा निर्णय केवळ “खोलवर विचार करून” आणि आंध्र प्रदेशची राजकीय स्थिरता लक्षात घेऊन घेतला होता.
“आमच्यात एकट्याने निवडणूक लढवण्याची ताकद होती. मछलीपट्टणम येथील सभेलाच सुमारे १० लाख लोक उपस्थित होते. पण आंध्र प्रदेश एका निर्णायक टप्प्यातून जात होता,” असे ते म्हणाले.
पवन कल्याण यांनी २०२३ मध्ये टीडीपी प्रमुख आणि सध्याचे आंध्र प्रदेशचे मुख्यमंत्री एन. चंद्रबाबू नायडू यांच्या अटकेचाही उल्लेख केला आणि त्या घटनेला एक महत्त्वाचा टर्निंग पॉइंट म्हटले. “काही मुद्द्यांवर आमचे मतभेद असू शकतात, पण आम्ही संवाद आणि चर्चा सुरूच ठेवली. जेव्हा चंद्रबाबू नायडूंसारख्या नेत्याला तुरुंगात टाकण्यात आले, तेव्हा तो आंध्र प्रदेशसाठी एक निर्णायक क्षण बनला,” असे ते म्हणाले.
पवन कल्याण म्हणाले की, राज्याच्या भविष्यासाठी आघाडीचे राजकारण आवश्यक झाले आहे आणि राजकीय अहंकार स्थिरतेपेक्षा वरचढ ठरू शकत नाही, असे प्रतिपादन केले.
टीव्हीकेच्या शानदार निवडणूक पदार्पणानंतर विजय यांनी तामिळनाडूचे मुख्यमंत्री म्हणून औपचारिकपणे आपल्या कार्यकाळाला सुरुवात केल्यानंतर काही दिवसांनी पवन कल्याण यांनी ही टिप्पणी केली आहे. २३४-सदस्यीय विधानसभेत १०८ जागांसह टीव्हीके सर्वात मोठा पक्ष म्हणून उदयास आल्यानंतर, अभिनेते-राजकारणी असलेल्या विजय यांनी चेन्नईच्या जवाहरलाल नेहरू इनडोअर स्टेडियममध्ये एका भव्य समारंभात शपथ घेतली.
स्वबळावर बहुमताचा आकडा गाठण्यात कमी पडले असले तरी, विजय यांनी बुधवारी विधानसभेत १४४ आमदारांच्या पाठिंब्याने विश्वासदर्शक ठराव सहज जिंकला. नाट्यमय घडामोडींमध्ये विश्वासदर्शक ठराव मंजूर झाला, ज्यात डीएमके आणि डीएमडीके सदस्यांनी सभात्याग केला, तर नेते सी. व्ही. षण्मुगम आणि एस. पी. वेलुमणी यांच्या नेतृत्वाखालील एआयएडीएमके गटाच्या काही गटांनी नवीन सरकारला पाठिंबा दिला, ज्यामुळे पक्षातील तीव्र मतभेद उघड झाले.