विमा पॉलिसी घेणाऱ्यांचा सिबिल स्कोअर आता बिघडू शकतो. बँका आणि इतर वित्तीय क्षेत्रांच्या धर्तीवर जनरल इन्शुरन्स क्षेत्रासाठी सिबिल स्कोअर लागू करण्याची सरकारची तयारी आहे. बनावट दाव्यांची वाढती प्रकरणे पाहता विमा कंपन्या बऱ्याच दिवसांपासून ही मागणी करत आहेत. नुकतीच विमा कंपन्यांच्या प्रतिनिधींनी सरकारच्या वित्तीय सेवा विभागासोबत बैठक घेतली.
वाहन आणि आयुर्मानासह अन्य विमा पॉलिसींसाठी सिबिल स्कोअर असलेले मॉडेल आणण्याबाबत चर्चा झाल्याचे सांगण्यात येत आहे. त्याच्या अंमलबजावणीमुळे विमा दाव्यांचा निपटारा होण्याबरोबरच कंपनीची कार्यक्षमताही वाढेल, असे कंपन्यांचे म्हणणे आहे. बनावट विमा दावे थांबविणे अत्यंत गरजेचे आहे, ज्याचा फायदा सर्वांनाच होईल.
एका अहवालानुसार, वाहन आणि आरोग्य विम्यातील बनावट दाव्यांची प्रकरणे झपाट्याने वाढत आहेत. बनावट वाहन विम्याचा दावा करण्यासाठी ग्राहक आणि ऑटो सर्व्हिस सेंटर एकमेकांशी संगनमत करत आहेत. यामुळे विमा कंपन्यांचे मोठे नुकसान होत आहे. आकडेवारीनुसार एकट्या आरोग्य विम्यात नऊ हजार कोटी रुपयांचा बनावट पैसा जमा करण्यात आला आहे.
जाणून घेऊया सिबिल स्कोअर म्हणजे काय?
सिबिल स्कोअरचा वापर सध्या बँकिंग क्षेत्रात केला जातो. ग्राहक वेळेत कर्जाची किती परतफेड करू शकतो हे सांगणारा हा स्केल आहे. कर्जाची परतफेड वेळेत केल्यास सिबिल स्कोअर चांगला मिळतो. त्याचबरोबर कर्जाची परतफेड वेळेत न केल्यास किंवा ईएमआय भरण्यास उशीर झाल्यास सिबिल स्कोअर खराब होतो. हा स्कोअर सर्व बँका आणि वित्तीय संस्थांसोबत शेअर केला जातो. त्यामुळे संबंधित ग्राहकाला पुढील कर्ज देण्यास बँका टाळाटाळ करीत आहेत. ग्राहकाला त्रासाला सामोरे जावे लागते.