मुंबई : प्रतिनिधी
मराठा आरक्षणाचा अहवाल मागितला अभ्यास सुरु आहे, धनगर समाजाचा अहवाल विचारला तर मंत्र्यांचा अभ्यास सुरु असल्याचे उत्तर मुख्यमंत्री देवेंद्र फडणवीस यांच्याकडून दिले जाते. सभागृहात असलेल्या मंत्र्यांनी शाळा, कॉलेजात कधी अभ्यास केलाय का? असा मिश्किल सवाल राष्ट्रवादी काँग्रेसचे नेते अजित पवार यांनी पणन राज्यमंत्री गुलाबराव पाटील यांचे नाव घेत विचारला.
विधानसभेत सत्ताधारी आणि विरोधकांच्या एकत्रित मांडण्यात आलेल्या दुष्काळी परिस्थितीवरील २९३ खालील प्रस्तावावर आपली भूमिका मांडताना त्यांनी वरील मिश्किल सवाल केला.
धनगर समाजाचा अहवाल टीस या संस्थेकडून राज्य सरकारला सादर करून दिड महिना झाला. मागील दिड महिन्यापासून या अहवालाचा अजून अभ्यासच सुरुच आहे. तो अहवाल आम्हालाही द्या आम्ही मंत्र्यांप्रमाणे अभ्यास करू असा चिमटाही मुख्यमंत्री देवेंद्र फडणवीस यांना अजित पवार यांनी काढला.