विरोधी पक्षनेते उदयनिधी स्टॅलिन यांच्या नाट्यमय अटकेवरून डीएमके आणि सत्ताधारी टीव्हीके यांच्यात तणाव वाढत असताना, एम. के. स्टॅलिन यांनी मंगळवारी विजय यांच्यावर सर्वात धारदार हल्ला चढवत त्यांना ‘अकार्यक्षम’ आणि ‘डमी मुख्यमंत्री’ म्हटले. एका सडेतोड निवेदनात, स्टॅलिन यांनी अहंकारामुळे विनाश होतो असा इशारा दिला आणि कावेरी पाणी प्रश्नावर राज्याच्या हिताचे रक्षण करण्यात आलेल्या ‘अपयशा’वरून लक्ष विचलित करण्यासाठी विजय सरकार पोलीस कारवाईचा वापर करत असल्याचा आरोप केला.
मद्रास उच्च न्यायालयाने उदयनिधी यांच्या सुटकेचे आदेश दिले असले तरी, डीएमके प्रमुख एम के स्टॅलिन यांनी विजय यांच्यावर टीका करताना कोणतीही कसर सोडली नाही. विजय यांची जवळची मैत्रीण असलेल्या अभिनेत्री त्रिशा यांच्या संदर्भात केलेल्या एका असभ्य टिप्पणीवरून विरोधी पक्षनेत्याला दिवसाच्या सुरुवातीला त्यांच्या चेन्नई येथील निवासस्थानातून अटक करण्यात आली.
माजी मुख्यमंत्र्यांनी दावा केला की, ही पोलीस कारवाई म्हणजे कावेरी प्रश्नावरील सरकारचे उघड अपयश लपवण्याचा किंवा शेजारील कर्नाटकच्या मेकेदातू धरणाला विरोध करण्याचा प्रयत्न आहे.
एम के स्टॅलिन म्हणाले की, अकार्यक्षम, नाममात्र मुख्यमंत्री कावेरीचे पाणी आणू शकत नाही, मेकेदातू धरण थांबवण्यासाठी आवाजही उठवू शकत नाही,अशी टीकाही यावेळी केली.
एम के स्टॅलिन यांनी असाही दावा केला की, शेतकरी त्रस्त असताना, टीव्हीकेचे मंत्री विजयचा चित्रपट (जन नायगन) पाहून अश्रू ढाळत होते. तामिळनाडूमध्ये एक जोकर मंत्रिमंडळ असल्याची टीकाही यावेळी केली.
एम के स्टॅलिन यांनी स्पष्ट केले की, त्यांच्या मुलाने भाषणात काहीही असभ्य म्हटले नाही किंवा कोणाचाही उल्लेख केला नाही. चुका झाल्या तरी तो लगेच माफी मागतो, असे म्हणाले.
उदयनिधी स्टॅलिन यांनी सोमवारी तंजावर येथे विजय सरकारच्या कावेरी पाणी विवाद हाताळणीविरोधात आयोजित केलेल्या आंदोलनादरम्यान कथित आक्षेपार्ह टिप्पणी केली होती. विजय आणि त्रिशा यांच्या मैत्रीच्या संदर्भात याकडे मोठ्या प्रमाणावर पाहिले गेले.
कावेरी जल व्यवस्थापन प्राधिकरणाच्या (CWMA) निर्देशांनंतरही कर्नाटकने आवश्यक प्रमाणात कावेरीचे पाणी सोडण्यास नकार दिल्याने टीव्हीके सरकार डीएमकेच्या टीकेचे लक्ष्य बनले आहे.
याशी कर्नाटकचा प्रस्तावित आणि वादग्रस्त मेकेदातू धरण प्रकल्प जोडलेला आहे, जो कावेरी नदी तामिळनाडूला जिथे मिळते त्याच्या जवळ आहे. तामिळनाडूने या प्रकल्पाला विरोध केला असून, नदीच्या वरच्या बाजूला पाणीसाठा वाढवल्यास कर्नाटकला पाण्याचा प्रवाह नियंत्रित करता येईल, असे त्यांचे म्हणणे आहे.
आपल्या निवेदनात, एम के स्टॅलिन यांनी अर्थसंकल्पीय अधिवेशन सुरू होण्याच्या एक दिवस आधी झालेल्या या अटकेच्या वेळेवरही प्रश्नचिन्ह उपस्थित केले. उदयनिधी स्टॅलिन यांना अटक करण्याचा कोणताही हेतू नसल्याचे टीव्हीके सरकारने उच्च न्यायालयात सादर केलेल्या युक्तिवादाचीही त्यांनी खिल्ली उडवली.
जर चौकशी करणे किंवा त्यांची चौकशी करणे हाच उद्देश असेल, तर ते चेन्नईमध्ये का केले नाही? त्यांना तंजावरला का नेले?” असा सवालही एम के स्टॅलिन यांनी केला. माजी मुख्यमंत्र्यांनी यावर जोर दिला की, मद्रास उच्च न्यायालयाचा निर्देश हा ‘फॅसिस्ट’ टीव्हीके पक्षाला एक मोठा धक्का आहे.
आपला हल्ला अधिक तीव्र करत, एम के स्टॅलिन यांनी विजय सरकारवर जूनमध्ये सत्तेवर आल्यापासून असंतोष दडपल्याचा आरोप केला.
एम के स्टॅलिन म्हणाले की, सत्तेवर आल्यापासून, विजय यांचे लक्ष केवळ त्यांच्यावर, त्यांच्या मंत्र्यांवर आणि सरकारवर टीका करणाऱ्यांना अटक करण्यावर केंद्रित आहे… दिलेली आश्वासने पूर्ण करण्यासाठी प्रयत्न करण्याऐवजी, विजय केवळ एक रील्स निर्माता म्हणून फिरण्यात समाधानी आहेत. त्यांनी आता आपल्या जबाबदाऱ्यांची जाणीव ठेवली पाहिजे, असा उफरोधिक टोलाही यावेळी लगावला.
अभिनेता-राजकारणी असलेल्या विजय यांच्यावर डीएमकेकडून वारंवार टीका होत आली आहे. डीएमकेने विजय यांच्यावर अलीकडील मेट्रो तपासणीपासून ते सरकारी बैठकांपर्यंतच्या अधिकृत कार्यक्रमांना प्रसिद्धीच्या झगमगाटात बदलल्याचा आरोप केला आहे.
आपले भाषण संपवण्यापूर्वी, एम के स्टॅलिन यांनी नवख्या टीव्हीके सरकारला एक कडक इशारा देताना म्हणाले की, अहंकार विनाशाचा मार्ग मोकळा करतो. सततचा अहंकार विनाशाला गती देतो! असा इशाराही यावेळी दिला.