Marathi e-Batmya

राजीव गांधी यांच्या जयंती दिनी राहुल गांधी यांची एक्सवर पोस्ट, आई सोनिया गांधी यांच्या अतुलनीय धैर्याचे कौतुक

Editor

देशाचे माजी पंतप्रधान स्व. राजीव गांधी यांच्या जयंती निमित्त काँग्रेस नेते तथा विरोधी पक्षनेते खासदार राहुल गांधी यांनी गुरुवारी त्यांच्या आई सोनिया गांधी यांनी दाखवलेल्या अतुलनीय धैर्याबद्दल कौतुक केले. १९९१ मध्ये त्यांचे वडील आणि माजी पंतप्रधान राजीव गांधी यांच्या निधनानंतर, त्यांनी सोनिया गांधींना आयुष्यात आलेल्या प्रत्येक संकटाचा “अखंड धैर्य आणि सन्मानाने” सामना करताना पाहिले असल्याची भावना यावेळी एक्सवरील पोस्टमधून व्यक्त केली.

५६ वर्षीय राहुल गांधी यांनी राजीव गांधी यांच्या ८२ व्या जयंतीनिमित्त ही श्रद्धांजली वाहिती. १० नोव्हेंबर रोजी प्रकाशित होणारे त्यांच्या आईचे आत्मचरित्र, ‘बिलॉन्गिंग: अ जर्नी ऑफ लव्ह’, “लवकरच त्यांच्यावर प्रेम करणाऱ्या लाखो लोकांकडून वाचले जाईल” याचा त्यांना अभिमान आहे, असे ते म्हणाले.

X वरील एका पोस्टमध्ये, राहुल गांधी यांनी त्यांच्या ७९ वर्षीय आईला “ममा” असे संबोधले आणि ३५ वर्षांहून अधिक वर्षांपूर्वी त्यांनी आपल्या आई-वडिलांना शेवटचे एकत्र पाहिल्याच्या आठवणींना उजाळा दिला.

“ज्या दिवशी बाबा गेले, त्या दिवसापासून मी तुम्हाला आयुष्याने तुमच्यावर टाकलेल्या प्रत्येक संकटाचा सामना अथांग धैर्याने आणि सन्मानाने करताना पाहिलं आहे. तुम्ही काय भोगलं आहे आणि बाबांच्या निधनानंतर तुमचं आयुष्य खरंच किती कठीण होतं, हे फक्त मला आणि प्रियांकालाच माहीत आहे,” अशी आठवणही यावेळी यावेळी राहुल गांधी यांनी करून दिली.

राहुल गांधी म्हणाले की, सोनिया गांधींची कहाणी अखेर त्यांच्यावर प्रेम करणाऱ्या लाखो लोकांकडून वाचली जाईल याचा त्यांना “आनंद आणि खूप अभिमान” वाटतो. राहुल गांधी पुढे ते म्हणाले की, त्यांच्या आईसारख्या खाजगी आयुष्य जगणाऱ्या व्यक्तीसाठी आपली कहाणी जगाला सांगणे किती कठीण होते, हे त्यांना माहीत आहे.

“आज, त्यांच्या वाढदिवशी, मला बाबा हसताना आणि त्यांच्या सुंदर सोनियाकडे अभिमानाने पाहताना दिसत आहेत,” असं लोकसभेतील विरोधी पक्षनेते म्हणाले.

१९८४ ते १९८९ या काळात पंतप्रधान राहिलेले राजीव गांधी यांचा जन्म २० ऑगस्ट १९४४ रोजी झाला होता. १९९१ मध्ये तामिळनाडूच्या श्रीपेरुंबुदूर येथे एलटीटीईच्या एका आत्मघाती हल्लेखोराने त्यांची हत्या केली, तेव्हा राहुल गांधी २० वर्षांचे होते.

राहुल यांची बहीण आणि काँग्रेस खासदार प्रियांका गांधी यांनीही राजीव गांधी यांच्या जयंतीनिमित्त सोनिया गांधी यांना आदरांजली वाहिली. त्यांनी म्हटले की, आपल्या पत्नीने “इतक्या मनापासून आणि प्रामाणिकपणे” आपली कहाणी लिहिल्याबद्दल वडिलांना त्यांचा अभिमान वाटला असता.

‘एक्स’वरील एका पोस्टमध्ये, ५४ वर्षीय प्रियांका गांधी यांनी आपल्या आई-वडिलांच्या नात्याचे वर्णन “आपल्या काळातील सर्वात मोठ्या प्रेमकथांपैकी एक” असे केले आणि त्या म्हणाल्या की, या नात्याच्या साक्षीदार होण्याचे भाग्य लाभले.

त्या म्हणाल्या की, सोनिया गांधी यांचे आत्मचरित्र वाचकांना त्यांच्या सार्वजनिक जीवनापलीकडे जाऊन त्यांना ओळखण्याची संधी देईल – एक “धाडसी, निष्ठावान, दयाळू स्त्री” जी “हट्टी आणि इच्छेनुसार अत्यंत विनोदी” देखील होती. “आई, तुझ्यावर खूप प्रेम आहे आणि तुझा खूप खूप अभिमान वाटतो,” असे म्हणत तिने आपली पोस्ट संपवली.

सोनिया गांधी यांचे आत्मचरित्र, ‘बिलॉन्गिंग: अ जर्नी ऑफ लव्ह’, १० नोव्हेंबर रोजी प्रकाशित होणार आहे, असे प्रकाशक अल्फ्रेड ए नॉफ यांनी मंगळवारी जाहीर केले. पेंग्विन रँडम हाऊस इंडियाने अद्याप भारतातील प्रकाशनाची तारीख निश्चित केलेली नाही.

या आत्मचरित्रात युद्धोत्तर इटलीपासून ते राजीव गांधींशी विवाह करण्यापर्यंत आणि भारतातील सर्वात शक्तिशाली राजकीय घराण्यांपैकी एकामध्ये सामील होण्यापर्यंतचा त्यांचा प्रवास रेखाटला आहे. यात त्यांच्या वैयक्तिक दुःखांचाही समावेश आहे, ज्यात राजीव गांधींच्या हत्येचा समावेश आहे, ज्यामुळे त्या राजकारणात ओढल्या गेल्या, आणि २००४ मध्ये पंतप्रधानपद नाकारण्याच्या त्यांच्या निर्णयाचाही समावेश आहे.

सोनिया गांधी यांनी माजी पंतप्रधान इंदिरा गांधी, हिंदी शिकणे आणि भारतातील जीवनाशी जुळवून घेणे, तसेच संजय गांधींच्या मृत्यूसह कुटुंबातील दुःखद घटनांबद्दलही लिहिले आहे.

हे आत्मचरित्र लिहिणे कठीण होते असे वर्णन करताना सोनिया गांधी म्हणाल्या की, याचा अर्थ स्वतःला व्यक्त करणे आणि त्यांनी “खूप आतमध्ये” ठेवलेले अनुभव इतरांना सांगणे हा होता.

Exit mobile version