पुढील महिन्यात होणाऱ्या दिल्ली विधानसभा निवडणुकीत मुख्यमंत्रीपदासाठी पक्षाचे उमेदवार असल्याचा आपचे राष्ट्रीय संयोजक अरविंद केजरीवाल यांचा दावा भाजपा नेते रमेश बिधुरी यांनी रविवारी फेटाळून लावला. रमेश बिधुरी यांनी या अटकळीला “पूर्णपणे निराधार” म्हटले आणि पक्षाचे समर्पित कार्यकर्ते म्हणून लोकांची सेवा करण्यावर आपले लक्ष असल्याचे सांगितले.
रविवारी जारी केलेल्या पत्रात, रमेश बिधुरी यांनी मुख्यमंत्रीपदासाठी कोणत्याही वैयक्तिक महत्त्वाकांक्षेला स्पष्टपणे नकार दिला आणि या अफवांना आपने जाणूनबुजून केलेली मोहीम म्हटले.
“माझा कोणत्याही पदावर दावा नाही. मुख्यमंत्रीपदासाठी माझ्याबद्दल बोलणे पूर्णपणे निराधार आहे,” असे बिधुरी यांनी पत्रात लिहिले आहे.
रमेश बिधुरी पत्रात पुढे म्हटले आहे की, “पक्षाने मला खूप काही दिले आहे आणि माझा कोणत्याही पदावर दावा नाही. अरविंद केजरीवाल यांनी माझ्या संदर्भात सतत दिशाभूल करणारी प्रचार मोहीम सुरू केली आहे. मी हे स्पष्ट करू इच्छितो की मी कोणत्याही पदाचा दावेदार नाही. मी जनतेची सेवा करण्यासाठी पूर्णपणे समर्पित आहे”.
रमेश बिधुरी पुढे म्हणाले की, ‘आप’ने मुख्यमंत्री म्हणून त्यांची नावे देऊन भाजपा दिल्लीत सरकार स्थापन करत असल्याचे अप्रत्यक्षपणे मान्य केले आहे.
रमेश बिधुरी पुढे बोलताना म्हणाले की, “माझ्याबद्दल घोषणा करून, अरविंद केजरीवाल यांनी अप्रत्यक्षपणे मान्य केले आहे की भाजपा दिल्लीत सरकार स्थापन करत आहे. त्यांनी पराभव स्वीकारला आहे कारण हे स्पष्ट आहे की दिल्लीतील लोक त्यांच्यावर मोठ्या प्रमाणात असंतुष्ट आहेत. लोकांना दारू घोटाळा, शिक्षण घोटाळा, आरोग्यसेवा घोटाळा, शीशमहाल वाद, तुटलेले रस्ते आणि घाणेरडे पिण्याचे पाणी याच्या तावडीतून स्वतःची सुटका करायची आहे. त्यांना दिल्लीत भाजपचे सरकार हवे आहे.
भाजपा नेत्याने हे स्पष्टीकरण दिले आहे कारण ‘आप’ नेते आगामी दिल्ली निवडणुकीसाठी बिधुरी यांना भाजपचे मुख्यमंत्रीपदाचे उमेदवार म्हणून दाखवणारे पोस्टर प्रसिद्ध करत आहेत.
पत्रात रमेश बिधुरी यांनी अरविंद केजरीवाल यांच्या नेतृत्वाखालील सरकारवर भ्रष्टाचार आणि प्रशासनातील अकार्यक्षमतेचा आरोप केला आहे. पाणी, वीज, शिक्षण आणि आरोग्यसेवा यासारख्या मुद्द्यांवर प्रकाश टाकताना, बिधुरी यांनी दावा केला की आप सरकार आपली आश्वासने पूर्ण करण्यात अपयशी ठरले आहे.
दिल्ली विधानसभा निवडणुकीत आप, भाजपा आणि काँग्रेस यांच्यात चुरशीची लढत होणार आहे, राष्ट्रीय राजधानीत ५ फेब्रुवारी रोजी मतदान होणार असल्याने राजकीय दावे वाढणार आहेत. निकाल ८ फेब्रुवारी रोजी जाहीर होतील.