Marathi e-Batmya
Related Articles
लोकसभा निवडणूकीत राष्ट्रवादी काँग्रेस शरदचंद्र पवार पक्षाच्या तुतारी या निवडणूक चिन्हाबरोबरच ट्रम्पेट या निवडणूक चिन्हाचे वाटपही काही ठिकाणच्या उमेदवारांना केंद्रीय निवडणूक आयोगाकडून करण्यात आले होते. या निवडणूक चिन्हाच्या नावात असलेल्या साधर्म्यामुळे बारामती, सातारा आणि अन्य एका ठिकाणी राष्ट्रवादी काँग्रेस शरदचंद्र पवार पक्षाच्या उमेदवाराला कमी मते मिळाली, तसेच पक्षाची अनेक मते प्रतिस्पर्धी पक्षाच्या उमेदवाराला मिळाली. त्यामुळे लोकसभा निवडणूकीत राष्ट्रवादीचे उमेदवार निवडून येता येता पराभूत झाले. यापार्श्वभूमीवर पिपाणी या निवडणूक चिन्हावर बंदी घालावी अशी मागणी राष्ट्रवादी काँग्रेस शरदचंद्र पवार पक्षाच्यावतीने केंद्रीय निवडणूक आयोगाकडे केली.
यासंदर्भात केंद्रीय निवडणूक आयोगाने महाराष्ट्र आणि झारखंडच्या विधानसभा निवडणूकीचा कार्यक्रम जाहिर केल्यानंतर काही प्रसारमाध्यमांच्या प्रतिनिधींनी राष्ट्रवादी काँग्रेस शरदचंद्र पवार पक्षाने केलेल्या मागणी संदर्भात निवडणूक आयोगाने काय निर्णय घेतला अशी विचारणा केली.
त्यावर केंद्रीय निवडणूक आयोगाचे मुख्य आयुक्त राजीवकुमार म्हणाले की, राष्ट्रवादी काँग्रेस शरदचंद्र पवार पक्षाकडून पिपाणी आणि तुतारीच्या नाम साधर्म्यामुळे तशी मागणी केली होती. तसेच पिपाणी हे निवडणूक चिन्हावर बंदी घालावी अशी मागणीही केली. मात्र पिपाणी या चिन्हावर आम्ही बंदी घालणार नसल्याचे स्पष्ट करत त्यापेक्षा राष्ट्रवादी काँग्रेस शरदचंद्र पवार पक्षाला दिलेल्या निवडणूक चिन्हातील तुतारी वाजविणारा मनुष्य अधिक गडद आणि सुस्पष्ट करणार असल्याचे सांगितले.
निवडणूक चिन्हात हा बदल केला गेल्याने शरदचंद्र पवार पक्षाचे निवडणूक चिन्ह अधिक सुस्पष्ट होईल असे मुख्य निवडणूक आयुक्त राजीवकुमार यांनी सांगितले.
दरम्यान प्रसारमाध्यमांच्या काही प्रतिनिधी राज्याच्या पोलिस महासंचालक रश्मी शुक्ला यांना पदावरून हटविण्याबाबत काँग्रेसने निवडणूक आयोगाकडे केलेल्या मागणीबाबत मुख्य निवडणूक आयुक्त राजीवकुमार यांना विचारले असता राजीवकुमार यांनी थेट उत्तर देण्याचे टाळले.
