Marathi e-Batmya
Related Articles
‘कॉकरोच जनता पार्टी’चे (CJP) संस्थापक अभिजीत दीपके यांनी कार्यकर्ते सोनम वांगचुक यांच्याशी मतभेद झाल्याच्या चर्चा फेटाळून लावल्या. त्यांनी सांगितले की, हे आंदोलन सोनम वांगचुक यांचे बलिदान कधीही विसरू शकत नाही आणि आपण दोघेही अजूनही एकाच भूमिकेवर ठाम आहोत.
विद्यार्थ्यांच्या नेतृत्वाखालील आंदोलनानंतर केंद्रीय शिक्षणमंत्री धर्मेंद्र प्रधान यांनी राजीनामा दिला; त्यानंतर एका वृत्तसंस्थेला दिलेल्या मुलाखतीत अभिजीत दिपके यांनी हे भाष्य केले.
आंदोलनाचा समारोप करताना सोनम वांगचुक यांचा उल्लेख न केल्यामुळे कॉकरोच जनता पार्टी CJP आणि सोनम वांगचुक यांच्यात फूट पडली आहे का, या प्रश्नाला उत्तर देताना अभिजीत दीपके यांनी ही शक्यता फेटाळून लावली.
अभिजीत दीपके म्हणाले की, नाही सर. आम्ही अजूनही एकाच भूमिकेवर आहोत. मी त्यांच्याशी फोनवर बोललो आहे, असे सांगितले.
अभिजीत दीपके म्हणाले की, त्यांनी विद्यार्थ्यांचे आभार मानले कारण २० जुलैनंतर हे आंदोलन देशातील तरुणांचे बनले होते आणि आंदोलनादरम्यान त्यांना पोलिसांच्या कारवाईचा सामना करावा लागला होता. त्याच वेळी, त्यांनी या मोहिमेत सोनम वांगचुक यांचे योगदान अत्यंत महत्त्वाचे असल्याचे अधोरेखित केले.
पुढे बोलताना अभिजीत दीपके पण सोनम वांगचुक सर यांनी दिलेले बलिदान आपण विसरू शकत नाही. त्यांनी स्वतःच्या जीवाची बाजी लावली. २६ दिवस ते उपोषणावर होते. स्वतःच्या जीवाची पर्वा न करता त्यांनी देशाला जागृत केले. स्वतःच्या जीवाची बाजी लावून त्यांनी सरकारला जाब विचारण्यासाठी देशाला रस्त्यावर आणले. आणि त्यांच्या उपोषणाशिवाय शिक्षणमंत्र्यांचा राजीनामा शक्य झाला नसता, असेही सांगितले.
अभिजीत दीपके यांनी पुढे सांगितले की, त्यांनी स्वतः सोनम वांगचुक यांना उपोषण मागे घेण्याची विनंती केली होती आणि जेव्हा त्यांनी अखेरीस उपोषण सोडले तेव्हा त्यांना दिलासा मिळाला.
अभिजीत दीपके पुढे म्हणाले की, मी त्यांना वैयक्तिकरित्या उपोषण सोडण्याची विनंती करत होतो. मी त्यांना म्हणत होतो, ‘सर, कृपया तुम्ही तुमचे उपोषण सोडा. आम्ही आमचे आंदोलन सुरू ठेवू.’ ज्या दिवशी त्यांनी उपोषण सोडले, त्या दिवशी मला खूप दिलासा मिळाला, असेही यावेळी सांगितले.
भाजपा नेते जे.पी. नड्डा आणि जितेंद्र सिंह यांच्या उपस्थितीत सोनम वांगचुक यांनी उपोषण सोडल्यामुळे त्यांना निराशा झाली का, असे विचारले असता, अभिजीत दीपके म्हणाले की, ते सोनम वांगचुक यांच्यावर नाराज नाहीत. नाही सर, मला त्या गोष्टीमुळे निराशा झाली नाही. मला निराशा या गोष्टीमुळे झाली की, भाजपचे नेते जे.पी. नड्डा आणि जितेंद्र सिंह यांना त्यांना भेटण्याची परवानगी दिली गेली, पण मला मात्र ती नाकारली गेली. मला त्यांना भेटायचे होते, पण मला भेटू दिले नाही. विरोधी पक्षाचे खासदारही त्यांना भेटण्याचा प्रयत्न करत होते, त्यांनाही भेटू दिले नाही. मग जे.पी. नड्डा आणि जितेंद्र सिंह यांना भेटण्याची परवानगी कशी मिळाली? असा सवालही यावेळी केला.
अभिजीत दीपके यांनी आरोप केला की, सोनम वांगचुक यांचे “सरकारने एक प्रकारे अपहरणच केले होते, कारण त्यांना, विरोधी पक्षाच्या नेत्यांना किंवा ‘सीजेपी’ (CJP) च्या सदस्यांना सोनम वांगचुक यांना भेटण्याची परवानगी दिली गेली नाही. तरीही, सोनम वांगचुक यांनी आपले उपोषण मागे घेतले याचा आपल्याला आनंद आहे, असे सांगत त्यांनी पुढे नमूद केले की, या देशाच्या भविष्यासाठी त्यांचे जीवन अत्यंत मौल्यवान आहे.
अभिजीत दीपके यांनी ‘कॉकरोच जनता पार्टी’ (CJP) च्या भविष्यातील वाटचालीबद्दलही माहिती दिली. त्यांनी सांगितले की, संघटनेचे महत्त्व वाढत असले तरी तिचे रूपांतर राजकीय पक्षात केले जाणार नाही. ही संघटना निवडणुका लढवण्याऐवजी एक ‘राजकीय दबाव गट’ (political pressure group) म्हणून काम करत राहील, असेही यावेळी स्पष्ट केले.
भाजपावरील आपले आरोप पुन्हा एकदा करताना अभिजीत दीपके म्हणाले की, आंदोलनादरम्यान झालेली हिंसा ही चळवळ मोडून काढण्यासाठी “भाजपाच्या गुंडांनी” घडवून आणली होती. हे कृत्य भाजपाच्या गुंडांनी केले. मी पहिल्या दिवसापासून सांगत आलो आहे की, भाजपा गोंधळ निर्माण करण्यासाठी आपल्या गुंडांना पाठवेल. त्यांनी अगदी तसेच केले आहे. ज्यांनी हे कृत्य केले, त्यांनीच पोलीस अधिकाऱ्यांनाही लक्ष्य केले, याचे मला दुःख वाटते. ज्या पोलीस अधिकाऱ्यांना अशा प्रकारे लक्ष्य करण्यात आले, त्यांच्याबद्दल आम्हाला सहानुभूती आहे. त्याच वेळी, पोलीस अधिकाऱ्यांकडून ज्या विद्यार्थ्यांची निर्घृणपणे मारहाण झाली, त्यांच्या कुटुंबीयांचे काय? असा सवालही यावेळी केला.
यावेळी अभिजीत दीपके यांनी आरोप केला की, विद्यार्थ्यांना लक्ष्य करण्यासाठी आणि आंदोलनात सहभागी होणाऱ्यांना धमकावण्यासाठी सराईत गुन्हेगारांचा वापर केला जात आहे. सराईत गुन्हेगारांचा बंदोबस्त कायद्यानुसारच केला गेला पाहिजे. ते विद्यार्थ्यांना लक्ष्य करण्यासाठी अशा सराईत गुन्हेगारांचा वापर करत आहेत. बिहारमधील लोकांनी दिल्लीत काहीही केले नाही किंवा मुंबईतील लोकांनीही दिल्लीत काही केले नाही. विद्यार्थ्यांना लक्ष्य करण्याचा हा एक कट आहे आणि त्यांना धमकावण्यासाठी हे केले जात आहे, जेणेकरून त्यांनी सरकारला प्रश्न विचारण्याचे किंवा पुन्हा आंदोलनासाठी बाहेर पडण्याचे धाडस करू नये, असा गंभीर आरोपही यावेळी केला.
अभिजीत दीपके यांनी सांगितले की, कॉकरोच जनता पार्टी CJP च्या भविष्यातील मोहिमा केवळ शिक्षणापुरत्या मर्यादित राहणार नाहीत, तर त्या बेरोजगारी आणि देशातील वाढती आर्थिक दरी या मुद्द्यांवरही लक्ष केंद्रित करतील. तरुणांवर आणि त्यांच्या उपजीविकेवर परिणाम करणाऱ्या मुद्द्यांना अधोरेखित करण्यासोबतच प्रशासनात उत्तरदायित्व आणण्याची या संघटनेची इच्छा असल्याचेही यावेळी सांगितले.
तरुणांमधील मानसिकतेबद्दल बोलताना अभिजीत दीपके म्हणाले की, राजकीय पक्ष, विविध संस्था आणि तपास यंत्रणांबद्दलचा अविश्वास वाढत चालला आहे. लोकशाही संस्थांवरील लोकांचा विश्वास पुन्हा निर्माण करणे अत्यंत आवश्यक असल्याचे सांगत, नमूद केले की हा अविश्वास लोकशाहीसमोरील एक गंभीर आव्हान आहे.
अभिजीत दिपके यांनी पूर्णवेळ राजकारणी बनण्याची शक्यताही फेटाळून लावली; त्यांनी सांगितले की, सध्याच्या परिस्थितीत अर्थपूर्ण बदल हा केवळ जनआंदोलनांच्या माध्यमातूनच साध्य होऊ शकतो, निवडणूक-आधारित राजकारणातून नाही. कॉकरोच जनता पार्टी CJP निवडणुकीच्या रिंगणात उतरण्याऐवजी जनआंदोलन म्हणून आपले कार्य सुरू ठेवेल.
संघटनेच्या पुढील मोहिमेबाबत बोलताना अभिजीत दीपके यांनी सांगितले की, आंदोलन संपल्यानंतर कॉकरोच जनता पार्टी CJP आता पुन्हा एकदा संघटित होत आहे.
