Marathi e-Batmya
Related Articles
मुंबई: प्रतिनिधी
सणासुदीच्या पार्श्वभूमीवर बहुतांशी बँकांनी आपल्या गृहकर्जाचे दर कमी केले आहेत. आता सार्वजनिक क्षेत्रातील बँक युनियन बँक ऑफ इंडियाने सर्वात कमी व्याजदरात गृहकर्ज देण्याची घोषणा केली आहे. युनियन बँकेने आपल्या गृहकर्जाचा व्याजदर कमी करून ६.४० टक्के केला आहे. आतापर्यंतचा हा सर्वात कमी व्याजदर आहे. याआधी कोणत्याही बँकेने इतक्या स्वस्त दरात कर्ज दिले नव्हते.
नवीन दर २७ ऑक्टोबरपासून लागू होणार असल्याचे बँकेने म्हटले आहे. यापूर्वी हा दर ६.८० टक्के होता. आतापर्यंत सर्व बँकांचे व्याजदर ६.५० टक्के पेक्षा जास्त आहेत. गृहकर्जासाठी हा आतापर्यंतचा सर्वात कमी दर असल्याचे बँकेने म्हटले आहे. जे ग्राहक नवीन कर्ज घेत आहेत किंवा जे ग्राहक आपले कर्ज इतर कोणत्याही बँकेतून युनियन बँकेत हस्तांतरित करतील त्यांना नवीन दर लागू होतील.
युनियन बँकेने सांगितले की, सणासुदीच्या काळात कर्जाची वाढती मागणी लक्षात घेऊन ग्राहकांच्या हितासाठी हा दर जाहीर केला आहे. सणासुदीच्या काळात गृहकर्ज खरेदीचे प्रमाण जास्त असते, त्यामुळे गृहकर्जाची मागणीही जास्त असते. युनियन बँक सर्वात कमी व्याजदरात गृहकर्ज देत आहे.
युनियन बँकेचे एमडी आणि सीईओ राजकिरण राय यांनी सांगितले की, ज्यांचे सिबिल स्कोअर ८०० पेक्षा जास्त आहे त्यांच्यासाठी हा गृहकर्जाचा व्याजदर असेल. ठेवींवरील व्याजदर कमी झाल्याने गृहकर्जाचे व्याजदर कमी होत आहेत. या कारणास्तव कर्जाच्या व्याजदरात कपात करण्याची संधी आहे.
सध्या कोटक महिंद्रा बँक, सारस्वत बँकेसह अनेक बँका ६.५०% दराने गृहकर्ज देत आहेत. ICICI बँक ६.७०%, SBI ६.७०%, बँक ऑफ बडोदा ६.७५%, बँक ऑफ महाराष्ट्र ६.८०% दराने गृहकर्ज देत आहे. बहुतांश बँका आणि NBFC चे गृहकर्जाचे व्याजदर सध्या ६.९०% च्या खाली आहेत.
एसबीआयने कर्जाची रक्कम कितीही असली तरी क्रेडिट स्कोअर लिंक्ड होम लोन फक्त ६.७० टक्के दराने देण्याची घोषणा केली आहे. यापूर्वी ७५ लाख रुपयांपेक्षा जास्त कर्जाची परतफेड ७.१५ टक्के दराने करावी लागत होती. बँक ऑफ बडोदाने त्यांच्या गृहकर्जावरील व्याजदर ६.७५ टक्क्यांवरून ६.५० टक्के केला आहे. बँकेने म्हटले आहे की ग्राहक ३१ डिसेंबर २०२१ पर्यंत या नवीन दरांचा लाभ घेऊ शकतात. हे नवीन दर गृहकर्जासाठी अर्ज करणाऱ्या सर्व ग्राहकांसाठी उपलब्ध असतील.
सार्वजनिक क्षेत्रातील कॅनरा बँकेने MCLR मध्ये ०.१५ टक्क्यांपर्यंत कपात करण्याची घोषणा केली होती. बँकेने त्यांचा एक वर्षाचा MCLR दर ०.१० टक्क्यांनी कमी करून ७.२५ टक्के केला आहे. कॅनरा बँकेचे नवे दर ७ ऑक्टोबरपासून लागू झाले आहेत. बँकेने एक दिवस आणि एक महिन्यासाठी MCLR ०.१५ टक्क्यांवरून ६.५५ टक्क्यांवर आणला आहे.
