Marathi e-Batmya
Related Articles
नवी दिल्लीः प्रतिनिधी
डिसेंबरमध्ये देशाची सोन्याची आयात तब्बल ७२ टक्क्यांनी वाढून ३.३९ अब्ज डॉलरवर गेली आहे. मोठ्या प्रमाणावर वाढलेल्या सोने आयातीमुळे या महिन्यात व्यापार तूटही वाढून ती १४.८८ अब्ज डॉलरवर पोचली आहे. डिसेंबर २०१६ मध्ये १०.५५ अब्ज डॉलरची ही तूट होती. त्यात आणखी ४ अब्जची वाढ झाली आहे.
देशाची निर्यात डिसेंबर महिन्यात १२ टक्क्यांनी वाढून २७ अब्ज डॉलरवर गेली आहे. तर एकूण आयातीत २१.१ टक्के वाढ झाली आहे. या महिन्यात ४१.९ अब्ज डॉलरची आयात करण्यात आली. डिसेंबरमध्ये तेलाच्या आयातीचे बील ३५ टक्के वाढून १०.३५ अब्ज डॉलर झाले आहे. याअगोदरच्या महिन्यात ९.५५ अब्ज डॉलरचे तेल आयात करण्यात आले होते. दरम्यान, इंजिनिअरींग वस्तू आणि ऑयल प्रोडक्‍ट्सची निर्यात डिसेंबरमध्ये २५ टक्के वाढली आहे. तर तयार कपड्यांची निर्यात मात्र ८ टक्क्याने घटून १.३३ अब्ज डॉलरची राहिली आहे. कच्च्या तेलाच्या किमती वाढत असल्याने तेल आयातीवरचा खर्च वाढल्याचे सरकारने म्हटले आहे.
एप्रिल – डिसेंबर दरम्यान निर्यात वाढली
एप्रिल – डिसेंबर २०१७ या कालावधीत निर्यात मागील वर्षीच्या तुलनेत २१.०५ टक्क्यांनी वाढली आहे. या कालावधीत देशाची निर्यात २२३.५१२ अब्ज डॉलरची झाली आहे. मागील वर्षीच्या याचकालावधीत १९९.४६७ अब्ज डॉलरची निर्यात झाली होती. दरम्यान, चालू आर्थिक वर्षाच्या ९ महिन्यात आयात २१.७६ टक्के वाढून ३३८.३६९ अब्ज डॉलरवर पोचली आहे.
