Marathi e-Batmya
Related Articles
स्टँड-अप कॉमेडियन कुणाल कामरा मंगळवारी महाराष्ट्र विधान परिषदेच्या विशेषाधिकार हक्कभंग समितीसमोर हजर झाले. हा प्रकार एकनाथ शिंदे यांच्याविरोधात करण्यात आलेल्या कथित आक्षेपार्ह वक्तव्याशी संबंधित आहे. मात्र मुख्य तक्रारदार गैरहजर राहिल्याने सुनावणी १० मार्चपर्यंत तहकूब करण्यात आली.
समितीचे अध्यक्ष प्रसाद लाड यांनी सांगितले की, तक्रारदार प्रवीण दरेकर उपस्थित नसल्यामुळे कुणाल कामरा यांचे जबाब नोंदवता आले नाहीत. आता दोन्ही बाजूंचे जबाब एकाच दिवशी घेण्याचा निर्णय झाला असून पुढील सुनावणी १० मार्च रोजी सायंकाळी चार वाजता होणार आहे.
या वेळी सुषमा अंधारे या देखील समितीसमोर हजर झाल्या. नंतर माध्यमांशी बोलताना कुणाला कामरा आणि सुषमा अंधारे यांनी सांगितले की, आपल्यावर नेमके कोणते आरोप आहेत, हे जाणून घ्यायचे होते; मात्र तक्रारदार नसल्यामुळे पुढील कारवाई होऊ शकली नाही. मुंबईत आल्यास गंभीर परिणाम भोगावे लागतील, अशा धमक्यांबाबत विचारले असता कुणाल कामरा म्हणाले की, आपण सुरक्षित असल्याची भावना आहे आणि जबाब नोंदवण्यासाठी पूर्णपणे तयार आहोत.
दरम्यान, प्रविण दरेकर यांनी शिंदे यांच्याविरोधातील कथित अपमानास्पद वक्तव्यावरून कुणाल कामरा आणि सुषमा अंधारे यांच्याविरुद्ध विशेषाधिकार हननाची नोटीस दिली होती. प्रविण दरेकर हे सत्ताधारी महायुतीतील घटक पक्ष असलेल्या भाजपाचे वरिष्ठ नेते आहेत, तर अंधारे शिवसेना उबाठाशी संबंधित आहेत.
या वादाचे मूळ गेल्या वर्षीच्या एका कार्यक्रमात आहे. त्या वेळी कुणाल कामरा यांनी पॅरोडी गीताद्वारे एकनाथ शिंदे यांच्यावर टोला लगावला होता. त्यानंतर संबंधित स्टुडिओमध्ये तोडफोड झाल्याची घटना समोर आली होती. त्या वेळी सुषमा अंधारे यांनी कामरा यांना उघडपणे पाठिंबा दिला होता. उल्लेखनीय बाब म्हणजे, या महिन्याच्या सुरुवातीला कुणाल कामरा यांनी समितीकडे मुदतवाढ मागितल्याचे काही माध्यमांनी केलेले वृत्त फेटाळून लावले होते. आता सर्वांचे लक्ष १० मार्चच्या सुनावणीकडे लागले असून, त्या दिवशी प्रथमच दोन्ही बाजू समोरासमोर येणार आहेत.
