Marathi e-Batmya
Related Articles
‘कॉकरोच जनता पार्टी’ने (CJP) शनिवारी त्यांचे संस्थापक अभिजीत दिपके यांचा एक पूर्व-मुद्रित (pre-recorded) व्हिडिओ शेअर केला. यात त्यांनी सांगितले की, जर त्यांना आणि इतर दोन नेत्यांना ताब्यात घेतले गेले, तर संघटनेचे प्रभारी अजिंक्य शिंदे हे मुख्य निवडणूक आयुक्त ज्ञानेश कुमार यांच्या विरोधात जंतर-मंतर येथे होणाऱ्या आंदोलनाचे नेतृत्व करतील.
या व्हिडिओमध्ये अभिजीत दीपके यांनी आपल्या संभाव्य अटकेचा अंदाज वर्तवला होता. तसेच, जर समर्थक हा व्हिडिओ पाहत असतील, तर त्यांनी अजिंक्य शिंदे यांच्या सूचनांचे पालन करावे असे आवाहन केले; यावरून ते स्वतः, सौरव दास आणि आशुतोष रांका यांना अटक झाली असल्याचे सूचित करत होते.
“जर तुम्ही हा व्हिडिओ पाहत असाल, तर याचा अर्थ असा की आशुतोष, सौरव आणि मला अटक झाली आहे,” असे अभिजीत दिपके यांनी व्हिडिओमध्ये म्हटले. त्यांच्या अनुपस्थितीत अजिंक्य शिंदे या आंदोलनाचे नेतृत्व करतील आणि समर्थकांना त्यांच्या मार्गदर्शनाखाली काम करण्यास सांगितले.
अभिजीत दीपके पुढे आपल्या व्हिडीओमध्ये म्हणाले की, “आमच्यानंतर अजिंक्य शिंदे या आंदोलनाचे नेतृत्व करतील. त्यामुळे, हे व्हिडिओ पाहणाऱ्या सर्वांनी कृपया अजिंक्य शिंदे यांचे अनुसरण करावे. आशुतोष, मी आणि सौरव यांच्या नंतर तेच ‘कॉकरोच जनता पार्टी’चा कारभार पुढे चालवतील,” असेही अभिजीत दीपके यांनी सांगितले.
दिल्ली पोलिसांनी दीपके, दास आणि रांका यांना राष्ट्रीय राजधानी दिल्लीत विमानतळावर विमान उतरल्यानंतर त्या विमानातूनच ताब्यात घेतले.
मुख्य निवडणूक आयुक्त ज्ञानेश कुमार यांच्या विरोधात जंतर-मंतर येथे नियोजित असलेल्या आंदोलनासाठी हे तिन्ही नेते मुंबईहून दिल्लीला आले होते.
सीजेपी CJP ने शेअर केलेल्या आणखी एका व्हिडिओमध्ये, अभिजीत दीपके विमानात प्रवेश करणाऱ्या आणि नेत्यांना खाली उतरण्यापासून रोखणाऱ्या पोलीस कर्मचाऱ्यांशी वाद घालताना ऐकू येतात.
अभिजीत दीपके पुढे म्हणाले की, पोलिस आम्हाला विमानातून खाली उतरू देत नाहीत. ते इतर प्रवाशांची गैरसोय करत आहेत. देश कोणत्या दिशेने चालला आहे हे तुम्ही पाहू शकता. ते आम्हाला थेट विमानातूनच अटक करायला आले आहेत. इंदिरा गांधींनीही असे केले नव्हते. ही हुकूमशाही आहे, कारण आम्हाला अटक करण्यासाठी दिल्ली पोलिसांनी विमानात प्रवेश केला आहे. आम्ही अटकेसाठीच इथे आलो आहोत. या आणि आम्हाला अटक करा,” असे म्हणाले. तीन नेत्यांना ताब्यात घेतल्यानंतर, सीजेपी CJP चे प्रभारी अजिंक्य शिंदे यांनी समर्थकांना आंदोलन सुरू ठेवण्याचे आवाहन केले. त्यांनी नरेंद्र मोदींच्या नेतृत्वाखालील सरकारवर राजधानीत लोकांना एकत्र येण्यापासून रोखण्याचा प्रयत्न केल्याचा आरोप केला.
“तुम्हाला माहितच आहे की, मोदी-शाहंच्या या हुकूमशाही सरकारने आज सकाळी दिल्ली विमानतळावर CJP चे तीन नेते – अभिजीत दिपके, सौरव दास आणि आशुतोष रंक – यांना ताब्यात घेतले आहे. हे हुकूमशाही सरकार देशाच्या एकजुटीला घाबरले आहे,” असे अजिंक्य शिंदे यांनी इन्स्टाग्रामवरील एका व्हिडिओमध्ये म्हटले आहे.
त्यांनी दावा केला की, जंतर-मंतरवर यापूर्वी झालेल्या आणि भाजप नेतृत्वाला आव्हान देणाऱ्या आंदोलनाची पुनरावृत्ती रोखण्यासाठी प्रशासन पावले उचलत आहे.
“गेल्या वेळी जेव्हा संपूर्ण देश एकत्र येऊन जंतर-मंतरवर पोहोचला होता, तेव्हा मोदी-शाह जोडीचा अहंकार मोडीत निघाला होता. म्हणूनच, असे पुन्हा घडू नये म्हणून त्यांनी सर्व बसेस आणि मेट्रो गाड्या थांबवल्या आहेत आणि शक्य असेल तिथून लोकांना ताब्यात घेतले आहे,” असे ते म्हणाले.
अजिंक्य शिंदे यांनी या अटकेला आणि कथित निर्बंधांना आंदोलनाच्या प्रगतीचा पुरावा मानले. तसेच, ज्या लोकांना मतदानाच्या अधिकारापासून वंचित ठेवण्यात आले आहे, त्यांच्या हक्कासाठीच हे आंदोलन असल्याचे त्यांनी नमूद केले.
“मोदी-शाहंची ही भीती हेच सिद्ध करते की आपण आर्धी लढाई जिंकलो आहोत आणि ही एका नवीन लढाईची सुरुवात आहे. ज्यांना मतदानाच्या अधिकारापासून वंचित ठेवले गेले आहे, त्यांना तो अधिकार मिळावा एवढीच आमची मागणी होती. ज्यांनी मते चोरली त्या ज्ञानेश कुमार यांचा राजीनामा आम्ही मागत होतो. म्हणूनच या हुकूमशाही सरकारने दिल्लीत आणीबाणीसारखी स्थिती निर्माण केली,” असे ते म्हणाले.
समर्थकांना आंदोलनस्थळाच्या दिशेने कूच करण्याचे आवाहन करताना अजिंक्य शिंदे यांनी सांगितले की, पोलिसांनी जिथे अडवले तिथेच पर्यायी आंदोलनस्थळ मानून आंदोलन करावे.
“या व्हिडिओद्वारे मी सर्व देशवासियांना आवाहन करतो की त्यांनी जंतर-मंतरच्या दिशेने निघावे आणि पोलिसांनी जिथे अडवले, तीच जागा तुमचे जंतर-मंतर समजावे. ज्ञानेश कुमार राजीनामा देत नाहीत तोपर्यंत हा लढा सुरूच राहील,” असेही यावेळी जाहिर केले.
संस्थेने दिलेल्या माहितीनुसार, नेत्यांना ताब्यात घेण्यापूर्वी पोलिसांनी त्यांना सांगितले की, जंतर-मंतरवर आंदोलन करण्याची परवानगी नाही. अभिजीत दीपके यांनी म्हटले की, सीजेपी CJP च्या नेत्यांना गुन्हेगारांप्रमाणे ताब्यात घेतले जात होते.
एका निवेदनात सीजेपी CJP ने या कथित अटकेचा निषेध केला आणि दावा केला की, ही कारवाई म्हणजे त्यांच्या नेत्यांना आंदोलनाच्या ठिकाणी पोहोचण्यापासून रोखण्यासाठी केलेली एक पूर्व-नियोजित कृती होती. संघटनेने या कारवाईचे वर्णन ‘मुक्तपणे हालचाल करण्याच्या स्वातंत्र्याचे उल्लंघन’ असे केले आणि तिन्ही नेत्यांची त्वरित व बिनशर्त सुटका करण्याची मागणी केली.
मतदार याद्यांची ‘विशेष सखोल पुनरावृत्ती’ (SIR) प्रक्रिया आणि मतदार नोंदणीसाठी वापरल्या जाणाऱ्या ‘फॉर्म ६’ मधील बदलांदरम्यान मतदार यादीत फेरफार केल्याच्या आरोपांवरून, मुख्य निवडणूक आयुक्तांविरोधात सीजेपी CJP ने हे आंदोलन पुकारले होते.
