Marathi e-Batmya
Related Articles
भारतीय जनता पार्टीचे (भाजपा) कार्याध्यक्ष नितीन नबीन यांची पक्षाच्या नवीन राष्ट्रीय अध्यक्षपदी निवड झाली आहे. पक्षाचे राष्ट्रीय निवडणूक अधिकारी, डॉ. के. लक्ष्मण यांनी आज नवी दिल्लीतील भाजपा मुख्यालयात ‘संगठन पर्व’ कार्यक्रमात नितीन नबीन यांच्या नियुक्तीची घोषणा केली आणि त्यांना निवडणुकीचे प्रमाणपत्र सुपूर्द केले. भाजपाचे ज्येष्ठ नेते आणि पंतप्रधान नरेंद्र मोदी आणि केंद्रीय मंत्री अमित शाह, राजनाथ सिंह, जे.पी. नड्डा आणि नितीन गडकरी यांनी नितीन नबीन यांचा सत्कार केला.
या प्रसंगी बोलताना पंतप्रधान नरेंद्र मोदी यांनी जगातील सर्वात मोठा पक्ष असलेल्या भाजपाच्या राष्ट्रीय अध्यक्षपदी नियुक्ती झाल्याबद्दल नितीन नबीन यांचे अभिनंदन केले. पंतप्रधान म्हणाले की, नितीन नबीन पक्षाचा वारसा पुढे नेतील. त्यांनी अधोरेखित केले की, नव्याने नियुक्त झालेले भाजपाचे राष्ट्रीय अध्यक्ष अशा पिढीचे आहेत, ज्यांनी देशातील मोठे आर्थिक, सामाजिक आणि तांत्रिक बदल पाहिले आहेत. पंतप्रधानांनी यावरही जोर दिला की, नितीन नबीन यांच्याकडे असलेली तरुणाईची ऊर्जा आणि संघटनात्मक कामाचा व्यापक अनुभव पक्षाच्या प्रत्येक कार्यकर्त्यासाठी खूप फायदेशीर ठरेल.
पंतप्रधान मोदी म्हणाले की, भारत घुसखोरांना आपल्या लोकांची आणि गरिबांसाठी असलेल्या सेवांची लूट करू देणार नाही. घुसखोर हे देशासाठी सर्वात मोठा धोका आहेत आणि त्यांना परत पाठवले पाहिजे. घुसखोरांचे संरक्षण करण्याचा प्रयत्न करणाऱ्या राजकीय पक्षांचा पर्दाफाश झाला पाहिजे.
पंतप्रधान नरेंद्र मोदी यांनी यावरही जोर दिला की, गेल्या अनेक महिन्यांपासून, संघटनेच्या सर्वात लहान घटकापासून ते राष्ट्रीय अध्यक्षांच्या निवडणुकीपर्यंत, संपूर्ण प्रक्रिया पूर्णपणे लोकशाही पद्धतीने पार पडली आहे. पक्षाचे नेतृत्व परंपरेने मार्गदर्शन केलेले, अनुभवाने समृद्ध आणि लोकसेवा व राष्ट्रसेवेच्या भावनेने संघटनेला पुढे नेणारे आहे. ‘संगठन पर्व’चा हा भव्य कार्यक्रम भाजपच्या लोकशाहीवरील श्रद्धा, संघटनात्मक शिस्त आणि कार्यकर्ता-केंद्रित दृष्टिकोणाचे प्रतीक आहे.
पंतप्रधान नरेंद्र मोदी यांनी यावरही प्रकाश टाकला की, भाजपावरील लोकांचा विश्वास सातत्याने दृढ झाला आहे. गेल्या ११ वर्षांत पक्षाने लोकांचा विश्वास संपादन करण्याचा एक उल्लेखनीय प्रवास केला आहे. लोकांची सेवा करणे हे नेहमीच पक्षाचे सर्वोच्च प्राधान्य राहिले आहे. जी पदे नव्हे, तर प्रक्रियांनुसार चालते. अध्यक्ष बदलतात, पण आदर्श बदलत नाहीत. असेही यावेळी सांगितले.
उपस्थितांना संबोधित करताना, नवनिर्वाचित भाजपाचे राष्ट्रीय अध्यक्ष नितीन नबीन यांनी पक्षातील सर्वोच्च पदावर पोहोचण्याची संधी दिल्याबद्दल पंतप्रधान मोदींचे आभार मानले. पक्षाचे अध्यक्ष म्हणून आपली निवड केल्याबद्दल त्यांनी इतर ज्येष्ठ भाजपा नेत्यांचेही आभार मानले. नितीन नबीन यांनी पक्षाच्या माजी राष्ट्रीय अध्यक्षांचेही स्मरण केले आणि या प्रसंगी उपस्थित असलेल्या माजी अध्यक्षांना अभिवादन केले. त्यांनी २००६ मध्ये पहिल्यांदा आमदार झाल्यापासूनच्या आपल्या प्रवासाची आठवण करून दिली. नितीन नबीन यांनी या दिवसाचे वर्णन संकल्पाचा क्षण असे केले. पंतप्रधान नरेंद्र मोदी यांचे भारताला विकसित राष्ट्र बनवण्याचे स्वप्न साकार करण्यासाठी देशातील १४० कोटी जनता अथक परिश्रम करत आहे.
केंद्रीय मंत्री जे.पी. नड्डा यांनीही नितीन नबीन यांच्या निवडीचे कौतुक केले आणि याला एक ऐतिहासिक प्रसंग असल्याचे सांगत नितीन नबीन हे वैचारिकदृष्ट्या परिपक्व आहेत, त्यांनी अगदी तरुण वयात पाच वेळा आमदार म्हणून काम केले आहे. एक तरुण, उत्साही आणि प्रतिभावान व्यक्तिमत्त्वाने राष्ट्रीय अध्यक्षपदाची जबाबदारी स्वीकारली आहे.
नितीन नबीन हे पक्षाच्या इतिहासातील सर्वात तरुण राष्ट्रीय अध्यक्ष आहेत आणि या पदावर नियुक्त होणारे बिहारमधील पहिले भाजपा नेते आहेत. ते सध्या पाटणा जिल्ह्यातील बांकीपूर विधानसभा मतदारसंघाचे प्रतिनिधित्व करतात आणि नितीश कुमार यांच्या नेतृत्वाखालील बिहार सरकारमध्ये रस्ते बांधकाम विभागाचे मंत्री आहेत. सुमारे दोन दशकांच्या संघटनात्मक अनुभवासह, नितीन नबीन यांनी पक्षात अनेक महत्त्वाच्या भूमिका बजावल्या आहेत, ज्यात भारतीय जनता युवा मोर्चाचे बिहार प्रदेशाध्यक्ष आणि छत्तीसगडसाठी भाजपाचे निवडणूक प्रभारी यांचा समावेश आहे.
