Marathi e-Batmya
Related Articles
गृह राज्यमंत्री (शहरे) योगेश कदम यांच्या अडचणी सातत्याने वाढ होत आहे. आईच्या नावाने डान्स बार चालवल्यानंतर आता त्यांच्यावर एका गुंडाच्या भावाच्या नावाने शस्त्र परवाना जारी करण्यास मान्यता दिल्याचा आरोप होत असून योगेश कदम यांच्यावरील या गंभीर आरोपामुळे राज्याचे राजकारण चांगलेच तापले आहे.
विरोधकांनी मुख्यमंत्री देवेंद्र फडणवीस यांच्याकडून योगेश कदम यांच्यावर कारवाई करण्याची आणि मंत्रीपदाचा राजीनामा देण्याची मागणी केली. दरम्यान, मंत्री योगेश कदम यांनी या आरोपांवर स्पष्टीकरण देताना म्हणाले की, शस्त्र परवाना देण्याचा निर्णय पोलिस आयुक्तांच्या स्वाक्षरीवर आधारित आहे. विरोधकांचे सर्व आरोप निराधार असल्याचे सांगत योगेश कदम म्हणाले की, मी लवकरच या प्रकरणाची सविस्तर माहिती देईन. मी सोशल मीडियावरही स्पष्टीकरण दिले आहे. मंत्री झाल्यापासून मी शस्त्र परवान्यासाठी गुन्हेगारी रेकॉर्ड असलेल्या एकाही व्यक्तीची शिफारस केलेली नाही.
पुढे बोलताना योगेश कदम पुढे म्हणाले की, जेव्हा सचिन घायवळ यांनी शस्त्र परवान्यासाठी अर्ज केला तेव्हा त्यांच्याविरुद्ध कोणताही गुन्हा दाखल झाला नाही. परवाना देताना, तो कोणाचा भाऊ आहे किंवा कोणाशी संबंधित आहे या मुद्द्याला महत्त्व नसते. जेव्हा एखाद्याच्या नावाने परवाना दिला जातो, तेव्हा त्या व्यक्तीची पार्श्वभूमी तपासली जाते.
योगेश कदम पुढे बोलताना म्हणाले की, २०१९ मध्ये न्यायालयाने सचिन घायवळ यांना १५ ते २० वर्षांपूर्वी दाखल केलेल्या सर्व खटल्यांमधून निर्दोष मुक्त केले. २०१५ ते २०२५ या दहा वर्षांत सचिन घायवळ यांच्याविरुद्ध एकही खटला दाखल झालेला नाही. मी माझ्या स्वतःच्या विवेकबुद्धीनुसार निर्णय घेतला आहे.
शिवसेना उबाठाचे आमदार आणि माजी मंत्री अनिल परब यांनी गुरुवारी महाराष्ट्राचे गृह राज्यमंत्री योगेश कदम यांच्यावर गँगस्टर नीलेश घायवळच्या भावाला शस्त्र परवाना देण्याची शिफारस केल्याचा आरोप केला.
अनिल परब पुढे म्हणाले की, सचिन घायवळ हा देशातून फरार असलेल्या हिस्ट्रीशीटर नीलेश घायवळचा भाऊ असल्याचा आरोप केला. पुणे पोलिसांच्या अहवालाचा हवाला देत अनिल परब म्हणाले की, गुन्हेगारी पार्श्वभूमी असलेल्या सचिन घायवळवर अनेक गुन्हे दाखल होते, परंतु पुराव्याअभावी त्याची निर्दोष मुक्तता झाली. पोलिसांनी त्याला शस्त्र परवाना देण्यासही नकार दिला. तथापि, योगेश कदम यांनी गुन्हेगाराच्या भावाला शस्त्र परवाना मिळवून देण्यात मदत केली. या संदर्भात ते मुख्यमंत्री देवेंद्र फडणवीस यांना कदम यांना मंत्रिमंडळातून काढून टाकण्याची मागणी करणार असल्याचेही यावेळी सांगितले.
