सुप्रिया सुळे यांचा गौप्यस्फोट, संसदेत बोलले की सदानंद सुळेंना नोटीस येते… फोन हॅकरकडून ४०० डॉलर्सची मागणी

नागरीकांना माझी विनंती आहे की आवश्यक ती सर्व काळजी घेऊनही माझे व्हॉट्सॲप हॅक झाले होते. कृपया आपण सर्वजण डिजीटल सुरक्षेविषयी आवश्यक ती काळजी घ्या. व्हॉट्सॲप वापरताना टू फॅक्टर व्हेरीफिकेशन करुन घ्या. आपले पासवर्ड, ओटीपी कुणालाही देऊ नये. तसेच अनोळखी क्रमांकावरुन आलेल्या लिंक क्लिक करु नये. डिजिटल सुरक्षा ही अतिशय महत्त्वाची बाब असून आपण आवश्यक ती काळजी घायला हवी असे आवाहन राष्ट्रवादी काँग्रेस शरदचंद्र पवार पक्षाच्या राष्ट्रीय कार्याध्यक्षा तथा खासदार सुप्रिया सुळे केले.
यशवंतराव चव्हाण प्रतिष्ठाण येथे प्रसारमाध्यमांच्या प्रतिनिधींशी सुप्रिया सुळे या बोलत होत्या त्यावेळी त्यांनी भूमिका मांडली.

फोन हॅकिंगविषयी बोलतानाा सुप्रिया सुळे म्हणाल्या की, हॅकरने माझं अकाऊंट परत देण्याच्या बदल्यात माझ्याकडे ४०० डॉलर्सची मागणी केली. हॅकरकडून अकाऊंट परत मिळवण्यासाठी पैसे दिले नाहीत. पोलिसांनी व व्हॉट्सॲप टीमने माझं अकाऊंट परत मिळवून दिलं. माझे व्हॉट्सॲप सुरू झाले आहे. व्हॉट्सॲप टीमने यासाठी अतिशय मोलाचे सहकार्य केले. याबद्दल टिम व्हॉट्सॲप व पुणे ग्रामीण पोलिसांचे मनापासून आभार. दरम्यानच्या काळात कुणी मेसेज केले असतील तर त्यांना मला या तांत्रिक बिघाडामुळे रिप्लाय करता आला नाही, याबद्दल माफीही मागितली.

सुप्रिया सुळे पुढे बोलताना म्हणाल्या की, मला फोनवर ओळखीच्या व्यक्तीकडून मेसेज आला होता हा मेसेज ओपन केल्यानंतर माझा फोन हँग झाला. तसेच माझ्या जवळच्या दोन ते तीन व्यक्तींचा देखील मोबाईल हॅक झाला. पक्षाच्या प्रदेश सरचिटणीस कु. अदिती नलावडे यांचा देखील मोबाईल हँग झाला होता. तसेच माझ्या आणि अदिती नलावडे यांच्या मोबाईल वरून १० हजार रुपये पाठवा असे मेसेज करण्यात आले होते. पोलिसांनी मला सांगितले आहे की हॅकरची नवीन सिस्टीम आलेली आल्याची माहितीही यावेळी दिली.

पुढे बोलताना सुप्रिया सुळे म्हणाल्या की, केंद्र सरकार विरोधात जेव्हा जेव्हा मी संसदेत बोलते तेव्हा सदानंद सुळे यांना आयकर विभागाची नोटीस येते हा योगायोग म्हणावा का? सेम नोटीस येते फक्त तारीख बदलली जातेय असे म्हणावे अशी उपरोधिक टीकाही यावेळी केली.
सुप्रिया सुळे पुढे बोलताना म्हणाल्या की, राज्यातील मराठा आरक्षणाविषयी राज्य सरकारने विशेष अधिवेशन बोलवायला पाहिजे या अधिवेशनात चर्चा करून आरक्षणाविषयी विधेयक मंजूर करून केंद्र सरकारकडे पाठवले पाहिजेत अशी भूमिकाही यावेळी मांडली.

सुप्रिया सुळे पुढे बोलताना म्हणाल्या की, शिवसेना शिंदे गटाने पार्लमेंटमध्ये मोठ्या ताकदीने भूमिका मांडली. अजित पवार आणि शिंदे युतीत आहेत. मग शिंदेंची आणि अजित पवार यांची भूमिका एकच आहे का? अजित पवारांच्या पक्षाने पार्लांमेटमध्ये भूमिका मांडल्याचे माझ्या ऐकिवात नसल्याचा टोलाही अजित पवार गटाला लगावला.

सुप्रिया सुळे म्हणाल्या की, उद्धव ठाकरे, अमोल मिटकरी, जितेंद्र आव्हाड, राज ठाकरे यांच्या ताफ्यावर झालेल्या हल्ल्याच्या विरोधात आहे. आमच्या पक्षाकडून जर झालं असतं तर मी स्ट्रॉग एक्शन घेतली असती असेही स्पष्टपणे सांगितले.