Marathi e-Batmya
Related Articles
मराठी ई-बातम्या टीम
विमानाने प्रवास करणे आता महाग होऊ शकते. विमानाचे इंधन म्हणजेच एटीएफ (एव्हिएशन टर्बाइन इंधन) ४.२ टक्क्यांनी महागले आहे. आंतरराष्ट्रीय बाजारात कच्च्या तेलाच्या किमतीत वाढ होत असताना या महिन्यात दुसऱ्यांदा एटीएफच्या किमती वाढवण्यात आल्या आहेत.
सरकारी मालकीच्या पेट्रोलियम कंपन्यांनी दिलेल्या माहितीनुसार, दिल्लीतील एटीएफच्या किंमती ३,२३२.८७ रुपये प्रति किलोलीटर किंवा ४.२५ टक्क्यांनी वाढून ७९,२९४.९१ रुपये प्रति किलोलीटर झाल्या आहेत. जानेवारी २०२२ मधील एटीएफच्या किंमतीतील ही दुसरी वाढ आहे. याआधी १ जानेवारी रोजी विमान इंधनाच्या किमतीत २,०३९.६३ रुपये प्रति किलोलीटर किंवा २.७५ टक्क्यांनी वाढ झाली होती आणि ती ७६,०६२.०४ रुपये प्रति किलोलीटरवर पोहोचली होती. त्याच वेळी, डिसेंबरमध्ये दोनदा एटीएफच्या किमतीत कपात करण्यात आली.
नोव्हेंबरच्या मध्यात जेट इंधन ८०,८३५.०४ रुपये प्रति किलोलीटरवर पोहोचले. १५ डिसेंबर रोजी एटीएफच्या किंमतींमध्ये एकूण ६,८१२.२५ रुपये प्रति किलोलीटर किंवा ८.४ टक्क्यांनी कपात करण्यात आली. जेट इंधनाच्या किंमती प्रत्येक महिन्याच्या १ आणि १६ तारखेला सुधारित केल्या जातात. पेट्रोल आणि डिझेलच्या किमती दररोज सुधारल्या जातात, परंतु ४ नोव्हेंबर २०२१ पासून वाहनांच्या इंधनाच्या किंमती बदललेल्या नाहीत. त्यावेळी केंद्र सरकारने पेट्रोलवरील उत्पादन शुल्कात ५ रुपयांनी तर डिझेलवरील उत्पादन शुल्कात १० रुपयांनी कपात केली होती.
मात्र, या काळात आंतरराष्ट्रीय स्तरावर ब्रेंट कच्च्या तेलाच्या किंमतीत बरीच अस्थिरता निर्माण झाली आहे. ब्रेंट क्रूड तेल ५ नोव्हेंबर २०२१ रोजी प्रति बॅरल ८२.७४ डॉलरवर होते. १ डिसेंबर रोजी ते प्रति बॅरल ६८.८७ डॉलर पर्यंत खाली आले. तेव्हापासून त्याच्या किंमती वाढत आहेत आणि ते प्रति बॅरल ८५ डॉलरपर्यंत पोहोचले आहे.
पेट्रोल आणि डिझेलच्या दरात सलग ७२ व्या दिवशी कोणताही बदल झालेला नाही
त्याचवेळी, वाहन इंधन म्हणजेच पेट्रोल आणि डिझेलच्या किमतीत सलग ७२ व्या दिवशी बदल झालेला नाही. सध्या दिल्लीत पेट्रोल ९५.४१ रुपये प्रति लीटर तर डिझेल ८६.६७ रुपये प्रति लिटर दराने विकले जात आहे. उत्पादन शुल्कात कपात करण्यापूर्वी वाहनांच्या इंधनाच्या किमती देशभरात आतापर्यंतच्या उच्चांकावर पोहोचल्या होत्या. बहुतांश शहरांमध्ये पेट्रोलचे भाव १०० रुपयांच्यावर गेले आहेत. त्याचवेळी अनेक शहरांमध्ये डिझेलनेही प्रतिलिटर १०० रुपयांचा टप्पा ओलांडला होता.
