Marathi e-Batmya
Related Articles
पंतप्रधान पदाच्या कार्यकाळात पहिल्यादाच नागपूर दौऱ्यावर आणि राष्ट्रीय स्वंयसेवक संघाच्या मुख्यालयाला पंतप्रधान नरेंद्र मोदी यांनी भेट दिली. त्यानंतर याच वर्षी सप्टेंबर महिन्यात पंतप्रधान नरेंद्र मोदी यांच्या वयाला ७५ वर्षे पूर्ण होत आहेत. या पार्श्वभूमीवर शिवसेना उबाठाचे नेते तथा प्रवक्ते संजय राऊत यांनी राष्ट्रीय स्वयंसेवक संघ पंतप्रधान नरेंद्र मोदी यांचा उत्तराधिकारी ठरवेल असे सांगत हा उत्तराधिकारी महाराष्ट्रातूनच असेल सांगत पुढील उत्तराधिकारी मुख्यमंत्री देवेंद्र फडणवीस असल्याचे सूचक वक्तव्य केले. त्यामुळे भाजपा आणि मुख्यमंत्री फडणवीस यांची हा दावा फेटाळून लावताना चांगलीच दमछाक होत असल्याचे दिसून आले आहे.
भाजपाने या अटकळींचे खंडन केले. मुख्यमंत्री देवेंद्र फडणवीस म्हणाले की, देश आणि पक्ष २०२९ मध्येही नरेंद्र मोदींना पंतप्रधान म्हणून पाहत आहे आणि ‘वडील जिवंत असताना’ उत्तराधिकाराबद्दल बोलणे ही मुघल परंपरा असल्याचे सांगत संजय राऊत यांचा दावा फेटाळून लावण्याचा प्रयत्न केला.
संजय राऊत पुढे बोलताना म्हणाले की, संघात सुरू असलेल्या सर्व चर्चा बंद दाराआड होतात. त्या बाहेर येत नाहीत. पण संकेत स्पष्ट आहेत. भावी नेता संघच ठरवेल आणि ती व्यक्ती महाराष्ट्रातील असेल, असे सांगून राज्याच्या राजकारणात एकच गदारोळ उडवून दिला.
नागपूरमध्ये पत्रकारांशी बोलताना भाजपाचे नेते तथा मुख्यमंत्री देवेंद्र फडणवीस म्हणाले, आम्ही पंतप्रधानांना आमचे नेते मानतो. उत्तराधिकारी निवडण्याचा प्रश्नच उद्भवत नाही. त्याची वेळ अजून आलेली नाही. माझ्या मते, माझे नाव त्यात नसल्याची पुस्तीही यावेळी जोडली.
पुढे बोलताना मुख्यमंत्री देवेंद्र फडणवीस म्हणाले की, मोदीजींसाठी उत्तराधिकारी निवडण्याचे कोणतेही कारण नाही. मोदीजी आमचे नेते आहेत. ते आणखी बरीच वर्षे काम करणार आहेत. २०२९ मध्येही मोदीजींना पंतप्रधान म्हणून पाहण्याचा आमचा आग्रह आहे. आता त्याबद्दल बोलण्यात काही अर्थ नाही. आपल्या भारतीय परंपरेत, वडील जिवंत असताना आपण उत्तराधिकाराचा विचार करत नाही. वडील जिवंत असताना मुले उत्तराधिकाराचा विचार करतात ही मुघल परंपरा आहे. हा विचार करण्याची वेळ नाही. ती वेळ अजून आलेली नाही असेही यावेळी सांगितले.
पंतप्रधान झाल्यानंतर आरएसएस मुख्यालयाला भेट देण्यासाठी पंतप्रधान नरेंद्र मोदी रविवारी नागपूरमध्ये आले होते. तसेच यावर्षी राष्ट्रीय स्वंयसेवक संघाचे शताब्दी वर्षही साजरे करण्यात येत आहे.
पंतप्रधान नरेंद्र मोदी सध्या ७४ वर्षांचे आहेत आणि या सप्टेंबरमध्ये ते ७५ वर्षांचे होतील. ७५ वर्षांचे झाल्यानंतर भाजपाच्या इतर वरिष्ठ नेत्यांप्रमाणे मोदीही पद सोडतील का असा सवाल विरोधकांकडून उपस्थित केला जात आहे.
महाराष्ट्राचे मुख्यमंत्री देवेंद्र फडणवीस यांनी सोमवारी सांगितले की, पंतप्रधान नरेंद्र मोदी यांचा उत्तराधिकारी शोधण्याची “गरज नाही” कारण ते २०२९ मध्ये पुन्हा सर्वोच्च पदावर राहतील.
खासदार संजय राऊत म्हणाले की, मोदींनी रविवारी नागपुरातील आरएसएस मुख्यालयाला भेट देऊन संघप्रमुख मोहन भागवत यांना निवृत्त होत असल्याचे सांगितले होते.
दरम्यान, नागपूरमध्ये असलेले ज्येष्ठ राष्ट्रीय स्वयंसेवक संघ नेते सुरेश ‘भैय्याजी’ जोशी म्हणाले की, पंतप्रधानांच्या बदलीबद्दल त्यांना माहिती नाही.
संजय राऊत पुढे म्हणाले की, मोदी गेल्या ११ वर्षांत कधीही संघाच्या मुख्यालयाला गेले नाहीत. परंतु ते रविवारी तेथे गेले आणि त्यांनी संघाला राजीनामा देत असल्याचे कळवले. २०१४ नंतर पंतप्रधानांची मुख्यालयाला पहिली भेट गेल्या वर्षी “तणावग्रस्त संबंधांनंतर” भाजपाच्या वैचारिक पालकत्वाबद्दलच्या भूमिकेत बदल झाल्याचे दिसून येत आहे.
