Marathi e-Batmya
Related Articles
काँग्रेसचे ज्येष्ठ नेते आणि लोकसभेतील विरोधी पक्षनेते राहुल गांधी यांनी रविवारी (१७ ऑगस्ट २०२५) बिहारमधील सासाराम येथून १६ दिवसांच्या ‘मतदार अधिकार यात्रे’ला सुरुवात केली.
ही यात्रा १,३०० किलोमीटर अंतर कापेल आणि १ सप्टेंबर रोजी पटना येथे एका मोठ्या रॅलीने संपेल, जिथे विविध भारतीय पक्षांचे नेते सहभागी होतील.
एक्स वरील पोस्टमध्ये त्यांच्या यात्रेची माहिती शेअर करताना राहुल गांधी म्हणाले, १६ दिवस. २०+ जिल्हे. १,३००+ किमी. आम्ही मतदार हक्क यात्रेसह लोकांमध्ये येत आहोत. ही सर्वात मूलभूत लोकशाही अधिकार – ‘एक व्यक्ती, एक मत’ – चे रक्षण करण्याची लढाई आहे. संविधान वाचवण्यासाठी बिहारमध्ये आमच्यात सामील व्हा, असे आवाहनही केले.
पक्षाचे प्रवक्ते पवन खेरा यांनी पत्रकारांना सांगितले की, ही यात्रा भारताच्या लोकशाही इतिहासातील आणखी एक मैलाचा दगड असेल. जेव्हा जेव्हा राहुल गांधी अशा मोर्चाला निघतील तेव्हा लोकशाहीने एक नवीन पान उलगडले आहे, ही यात्रा एक ऐतिहासिक प्रवास असेल, जी आपल्या सर्वांच्या अस्तित्वाच्या लढाईत एक मैलाचा दगड ठरेल असेही यावेळी सांगितले.
यात्रेची माहिती देताना पवन खेरा म्हणाले की, राष्ट्रीय जनता दल (आरजेडी) नेते तेजस्वी यादव यांच्याव्यतिरिक्त, इंडिया ब्लॉकचे इतर भागीदार देखील या यात्रेचा भाग असतील.
निवडणूक आयोगाने विरोधी पक्षावर “मत चोर” आरोप केल्यामुळे निवडणूक आयोग केवळ त्याच्या “अक्षमतेसाठी”च नव्हे तर त्याच्या “स्पष्ट पक्षपातीपणासाठी” “पूर्णपणे उघड” झाला आहे असा आरोपही काँग्रेसने केला.
LIVE: LAUNCH of #VoterAdhikarYatra | Sasaram, Bihar https://t.co/4vsY7oPMCk
— Rahul Gandhi (@RahulGandhi) August 17, 2025
निवडणूक आयोगाने सत्ताधारी पक्ष आणि विरोधी पक्ष यांच्यात कोणताही फरक न करण्याचा केलेला दावाही “हास्यास्पद” असल्याचे काँग्रेसने म्हटले आहे.
यावेळी मतदार अधिकार यात्रेत बोलताना राजद प्रमुख लालूप्रसाद म्हणाले, बिहार वाचवण्यासाठी चोर आणि भाजपाला बाहेर काढा आणि लोकशाही मजबूत करा. लालू प्रसाद यादव यांच्या भाषणानंतर, राहुल गांधी, तेजस्वी यादव आणि इंडिया ब्लॉकच्या इतर नेत्यांनी मतदार अधिकार यात्रेला हिरवा झेंडा दाखवला.
काँग्रेस प्रमुख मल्लिकार्जुन खर्गे म्हणाले, भाजपा आणि आरएसएस गरीब लोकांसाठी, महिलांसाठी आणि तरुणांसाठी धोकादायक आहेत. भाजपा आम्हाला सर्वत्र त्रास देत आहे, मग ते पाठ्यपुस्तकांमध्ये असो किंवा विद्यापीठांमध्ये असो. राज्यपाल सरकारचे ‘चमचा’ बनले असल्याचा आरोपही यावेळी केला.
पुढे बोलताना मल्लिकार्जुन खर्गे म्हणाले, संविधानाचे रक्षण करण्यासाठी लोकांनी आम्हाला मदत करावी. बाबासाहेब आंबेडकरांचे संविधान सर्वांना मतदान करण्याचा हक्क देते. काँग्रेस हा असा पक्ष आहे जो सर्वांना समान अधिकार देतो. आम्ही तुमची मते वाचवण्यासाठी लढत आहोत. आम्हाला मतदानाचा अधिकार आहे, पण लाल किल्ल्यावर उभे राहून नरेंद्र मोदी म्हणत आहेत की ते मते हिरावून घेतील. हे आरएसएसचे लोक स्वातंत्र्याविरुद्ध आणि महात्मा गांधींच्या विरोधात होते असा आरोपही यावेळी केला.
मल्लिकार्जून खर्गे पुढे म्हणाले, तुमच्या एकही माणूस तुरुंगात गेलेला नाही, तुमच्या एकाही माणसाने प्राण दिले नाहीत. नरेंद्र मोदी खूप धोकादायक माणूस आहे आणि जोपर्यंत तो सत्तेवरून हटवला जात नाही तोपर्यंत तुमचे मत सुरक्षित हातात राहणार नाही. तुम्ही सर्वजण एकत्र उभे राहा, बिहार आणि केंद्रातील सरकार लवकरच बदलेल, असा विश्वासही यावेळी व्यक्त केला.
मल्लिकार्जून खर्गे पुढे बोलताना म्हणाले, निवडणूक आयोग सरकारचा एजंट बनला असल्याचा आरोपही यावेळी केला.
रॅलीत बोलताना लोकसभेतील विरोधी पक्षनेते राहुल गांधी म्हणाले, महाराष्ट्रात सर्व ओपिनियन पोल असे भाकित करत होते की इंडिया आघाडी सरकार स्थापन करेल परंतु निवडणुकीच्या निकालांमध्ये भाजपाच्या नेतृत्वाखालील आघाडीने सरकार स्थापन केले. भाजपाला १ कोटी नवीन मतदारांची मते मिळाली असल्याचे मत चोरीच्या संदर्भाने सांगितले.
राहुल गांधी पुढे म्हणाले की, संपूर्ण देशात मतांची चोरी सुरू आहे. एसआयआरच्या नावाखाली ते नवीन मतदार जोडू इच्छितात आणि मते चोरू इच्छितात. बिहारमध्ये आम्ही मतदान चोरीला परवानगी देणार नाही. भाजपा प्रत्यक्ष जातीय जनगणना करणार नसल्याचा आरोपही यावेळी केला.
