Marathi e-Batmya
Related Articles
काही दिवसांपूर्वी मध्य प्रदेशातून पुण्याला येणाऱ्या राज्याच्या एसटी बसचा अपघात होवून १३ प्रवाशांना आपले प्राण गमवावे लागल्याची घटना ताजी असतानाच आज सोलापूर जिल्ह्यात आणखी एक एसटी बसला अपघात झाला. मात्र सुर्देवाने या अपघातात कोणतीही जीवीतहानी झाली नाही. मात्र ३५ प्रवासी जखमी झाले.
सोलापूर जिल्ह्यातील अक्कलकोट-मैंदर्गी मार्गावर गाणगापूर येथील एसटी बसला झालेल्या भीषण अपघातात ३५ प्रवासी जखमी झाले. या अपघातातील जखमी प्रवाशांना अक्कलकोट ग्रामीण रुग्णालयात हलविण्यात आले. अक्कलकोट येथील रुग्णालयात एकच डॉक्टर असल्याने खासगी डॉक्टरांनादेखील पाचरण करण्यात आले. सकाळी १०.३०च्या सुमारास हा अपघात झाला असून अपघाताचे नेमके कारण अद्याप समोर आले नाही.
या अपघाताची माहिती मुख्यमंत्री एकनाथ शिंदे यांना कळताच त्यांनी तातडीने सोलापूरचे जिल्हाधिकारी मिलिंद शंभरकर यांना फोन करून निर्देश दिले. अपघातातील जखमी प्रवाशांना तातडीने अक्कलकोट किंवा जवळपासच्या रुग्णालयांत हलवून योग्य त्या उपचारांची व्यवस्था करण्याचे निर्देश त्यांनी प्रशासनाला दिले. मुख्यमंत्र्यांनी एसटी महामंडळ व पोलिसांकडून याची माहिती घेतली व जखमी तसेच इतरही प्रवाशांची व्यवस्था करावी अशा सूचना दिल्या.
त्याचप्रमाणे अपघातात ज्यांना गंभीर दुखापत झाली आहे, अशा ठराविक किंवा अस्थिभंग झालेल्या प्रवाशांना मुख्यमंत्री सहायता निधीतून ५० हजार रुपये अधिकची आर्थिक मदत करण्यात यावी, असे निर्देशही मुख्यमंत्र्यांनी दिले.
तसेच फोनवरून व्हिडिओ कॉलच्या माध्यमातून मुख्यमंत्री एकनाथ शिंदे यांनी जखमी प्रवाशांशी संपर्क साधून त्यांना दिलासा देण्याचा प्रयत्न केला.
सोलापूर – गाणगापूर #एसटी बसला अक्कलकोटजवळ आज सकाळी झालेल्या अपघाताची मुख्यमंत्री @mieknathshinde यांनी दखल घेतली आहे. हा अपघात झाल्याचे कळताच मुख्यमंत्र्यांनी @msrtcofficial व पोलिसांकडून याची माहिती घेतली. जखमीसह इतरही प्रवाशांची व्यवस्था करावी अशा सूचनाही दिल्या आहेत. pic.twitter.com/oGDpaZ4BKO
— MAHARASHTRA DGIPR (@MahaDGIPR) July 24, 2022
