Marathi e-Batmya
Related Articles
काही दिवसांपूर्वी पुणे जिल्ह्यातील नसरापूर गावात ३ वर्षांच्या मुलीवर बलात्कार करून तिची हत्या केल्याप्रकरणी पुण्यातील एका विशेष न्यायालयाने ६५ वर्षीय व्यक्तीला फाशीची शिक्षा सुनावली. परिस्थितीजन्य पुरावे आणि सरकारी पक्षाचा ‘गुन्ह्याच्या वेळी आरोपी आणि पीडिता यांना शेवटचे एकत्र पाहिले गेले होते’ (last seen together) या सिद्धांताच्या आधारे आरोपीला दोषी ठरवून, गुन्हा घडल्यापासून ६० दिवसांच्या अर्थात ५५ दिवसात हा निकाल देण्यात आला.
ही धक्कादायक घटना १ मे २०२६ रोजी घडली. भीमराव कांबळे असे आरोपीचे नाव असून, त्याने आपल्या मामाच्या गावी आलेल्या त्या चिमुरडीला आमिष दाखवून जवळच असलेल्या एका गोठ्यात नेले आणि तिथे तिच्यावर बलात्कार करून तिची हत्या केली. मुलगी बेपत्ता झाल्यानंतर तिच्या कुटुंबीयांनी तिचा शोध सुरू केला असता त्या मुलीचा मृतदेह त्या गोठ्यात लपवून ठेवल्याचे आढळून आले.
आपल्या आदेशात विशेष न्यायालयाने नमूद केले की, सरकारी पक्षाने ‘लास्ट सीन टुगेदर’ सिद्धांत आणि भक्कम परिस्थितीजन्य पुराव्यांच्या आधारे आरोपीचा गुन्ह्यातील सहभाग यशस्वीपणे सिद्ध केला.
हा गुन्हा अत्यंत गंभीर असल्याचे निरीक्षण न्यायालयाने नोंदवले. तसेच, आरोपीची यापूर्वी दोन प्रकरणांतून निर्दोष मुक्तता झाली असली, तरी त्याच्या वर्तनात सुधारणेची किंवा पश्चात्तापाची कोणतीही चिन्हे दिसून आली नाहीत, असेही विशेष न्यायालयाने नमूद केले.
“आरोपी समाजासाठी धोकादायक आहे. त्याच्यात पश्चात्ताप किंवा सुधारणेची कोणतीही लक्षणे नाहीत. तो सुधारण्याच्या पलीकडे गेला आहे,” असे निरिक्षणही न्यायालयाने आपल्या निकाल पत्रात म्हटले.
आरोपीची बाजू मांडणारे वकील हिम्मतराव सूर्यवंशी यांनी युक्तिवाद केला की, ‘लास्ट सीन टुगेदर’ सिद्धांत सिद्ध करण्यासाठी कोणताही ठोस पुरावा उपलब्ध नाही. त्यांनी न्यायालयाला आरोपीचे वय आणि कुटुंब व ग्रामस्थांकडून त्याला मिळणारी वागणूक (सामाजिक एकाकीपणा) यांचा विचार करण्याची विनंती केली. तसेच, हा गुन्हा फाशीची शिक्षा देण्यासाठी आवश्यक असलेल्या ‘दुर्मिळातील दुर्मिळ’ (rarest of rare) श्रेणीत येत नाही, असा युक्तिवादही केला.
बचाव पक्षाने फाशीऐवजी जन्मठेपेची शिक्षा देण्याची मागणी केली.
सरकारी वकील अजय मिसर यांच्या नेतृत्वाखालील सरकारी पक्षाने आरोपीविरुद्ध पुरावे सादर केले. गुन्ह्याचे स्वरूप आणि पीडितेचे वय लक्षात घेता आरोपीला जास्तीत जास्त शिक्षा देण्याची मागणी केली.
राष्ट्रवादी काँग्रेस पार्टी (एसपी) च्या खासदार सुप्रिया सुळे यांनी न्यायालयाच्या या निर्णयाचे स्वागत केले आणि पीडित मुलगी व तिच्या कुटुंबाला न्याय मिळाल्याचे म्हटले. “अखेरीस, पीडित चिमुरडीला न्याय मिळाला आहे आणि आम्ही सर्वजण या निकालाचे स्वागत करतो. ही घटना अत्यंत दुर्दैवी होती. आरोपीला फाशीची शिक्षाच होईल, अशी अपेक्षा होती. अशा प्रकरणांची सुनावणी ‘फास्ट-ट्रॅक’ न्यायालयात व्हावी आणि आरोपीला निश्चितपणे शिक्षा व्हावी, अशी भूमिका आम्ही सातत्याने मांडली आहे. दरम्यान, तपास अधिकाऱ्यांनी अत्यंत उत्कृष्टपणे तपास करून न्यायालयात पुरावे सादर केले. याबद्दल आम्ही तपास यंत्रणेचेही मनापासून आभार मानतो,” असे सुळे यांनी ‘एक्स’ (X) वरील एका पोस्टमध्ये म्हटले आहे.
