Marathi e-Batmya
Related Articles
सोशल मीडिया पोस्ट आणि ऑनलाइन समोर आलेल्या एका ऑडिओ क्लिपनुसार, अभिनेता आमिर खानला गँगस्टर लॉरेन्स बिश्नोईच्या टोळीतील सदस्यांकडून धमकी मिळाली आहे.
लॉरेन्स बिश्नोईचा भाऊ अर्झू बिश्नोई याने टायसन बिश्नोई नावाच्या दुसऱ्या व्यक्तीसोबत सोशल मीडियावर शेअर केलेल्या व्हायरल पोस्टनुसार, आमिर खानला इशारा देण्यात आला आहे. अर्झू बिश्नोईचा आवाज असलेली एक ऑडिओ क्लिप देखील ऑनलाइन समोर आली आहे.
मात्र, ऑडिओ क्लिप किंवा सोशल मीडिया पोस्टच्या सत्यतेची स्वतंत्रपणे पडताळणी करता आली नाही.
ऑडिओ क्लिपमध्ये, अर्झू बिश्नोईने आमिर खानवर ‘लव्ह जिहाद’ला प्रोत्साहन दिल्याचा आरोप केला आहे, आणि दावा केला आहे की हे भारतीय संस्कृतीच्या विरोधात आहे. त्याने अभिनेत्याला इशारा दिला आहे की अशा कृती सहन केल्या जाणार नाहीत.
तो म्हणाला, “आमिर खानसारखे जे लोक आपल्या देशात ‘लव्ह जिहाद’च्या नावाखाली आमच्या संस्कृतीच्या विरोधात असलेल्या गोष्टींना प्रोत्साहन देत आहेत, त्यांना इशारा दिला जात आहे की आम्ही अशा कृती कधीही सहन करणार नाही. त्याला आणि त्याच्या साथीदारांना इशारा दिला जात आहे की त्यांच्या कृत्यांचे परिणाम लवकरच भोगावे लागतील. ते जिथे कुठे सापडतील, तिथे आम्ही त्यांना असा धडा शिकवू की ते भविष्यात तो लक्षात ठेवतील.”
दुसरीकडे, अर्झूच्या सोशल मीडिया पोस्टचे भाषांतर असे होते: “मी अर्झू बिश्नोई आणि टायसन बिश्नोई (लॉरेन्स बिश्नोई ग्रुप) आहे. आमिर खानसारखे लोक, जे आपल्या देशात ‘लव्ह जिहाद’च्या नावाखाली आमच्या संस्कृतीच्या विरोधात असलेल्या गोष्टींना प्रोत्साहन देत आहेत, त्यांना आम्ही सहन करणार नाही. याचे उत्तर लवकरच दिले जाईल. आमच्या मते, हे सनातन धर्म आणि देशाच्या विरोधात आहे.”
पुढे त्या पोस्टमध्ये म्हटले आहे की, “आम्ही आमच्या बंधू-भगिनींना आणि देशबांधवांना वचन देतो की, जो कोणी अशा कृत्यांना प्रोत्साहन देईल, त्याला आमच्या पद्धतीने उत्तर दिले जाईल. जे स्टारडमच्या नावाखाली अशा गोष्टींना प्रोत्साहन देतात, त्यांचा अहंकार आम्ही चिरडून टाकू. त्याच वेळी, राजस्थानमधील श्री गंगानगर येथे एका निष्पाप मुलीसोबत घडलेल्या घृणास्पद घटनेबाबत प्रशासनाने कौतुकास्पद काम केले आहे, परंतु काही राजकीय लोक कथितरित्या काही आरोपींना वाचवण्याचा प्रयत्न करत आहेत.”
आरझूने असा इशाराही दिला की, निष्पाप मुलीसोबत घडलेल्या घटनेशी कथितरित्या संबंधित असलेल्या आणि कायदेशीर कारवाईतून सुटलेल्या कोणालाही परिणामांना सामोरे जावे लागेल. या पोस्टमध्ये राजकीय नेत्यांना हस्तक्षेप न करण्याचा किंवा आरोपींना वाचवण्याचा प्रयत्न न करण्याचा इशारा देण्यात आला आहे, कारण अशा कृतींचेही असेच परिणाम होतील.
या प्रकरणाचा तपास करणाऱ्या मुंबई पोलिसांनी सांगितले, “आम्ही आमिर खानबद्दलच्या सोशल मीडिया पोस्ट आणि व्हॉइस क्लिपच्या सत्यतेची तपासणी करत आहोत.”
यापूर्वी, ६१ वर्षीय अभिनेत्याने ‘लव्ह जिहादचा ब्रँड ॲम्बेसेडर’ असल्याच्या आरोपांवर स्पष्टीकरण दिले होते. त्याने म्हटले होते की, त्याच्या कुटुंबाने नेहमीच आंतरधर्मीय संबंधांचा आदर केला आहे आणि त्यांना स्वीकारले आहे. त्याने स्पष्ट केले की, त्याच्या कुटुंबातील कोणत्याही विवाहात धर्मांतरण झालेले नाही. यावर्षी ५ जुलै रोजी मुंबईतील राहत्या घरी आपली जुनी मैत्रीण गौरी स्प्रॅट हिच्याशी विवाह केलेल्या या
सुपरस्टारने रेडिफला दिलेल्या मुलाखतीत या विषयावर भाष्य केले. त्याने सांगितले की, त्याच्या कुटुंबातील अनेक सदस्यांनी हिंदू आणि ख्रिश्चन व्यक्तींशी नागरी विवाह सोहळ्याद्वारे आंतरधर्मीय विवाह केले आहेत आणि या विवाहांमध्ये धर्म किंवा धर्मांतराचा कधीही संबंध नव्हता.
‘लव्ह जिहाद’च्या आरोपांवर प्रतिक्रिया देताना अभिनेते आमिर खान म्हणाले, सत्य हे आहे की आमचे कुटुंब खूप सर्वसमावेशक आहे. माझ्या दोन्ही बहिणींचे लग्न हिंदूंशी झाले आहे; माझ्या मुलीचे लग्नही हिंदूशी झाले आहे. माझा चुलत भाऊ मन्सूर याचे लग्न ख्रिश्चन व्यक्तीशी झाले आहे.
पुढे बोलताना आमिर खान म्हणाले, गौरी, किरण किंवा रीना यांपैकी कोणीही धर्मांतर केले नाही, कारण आमचे विवाह सिव्हिल पद्धतीने झाले होते. गौरी हिंदूसुद्धा नाही, ती ख्रिश्चन आहे, आणि तीसुद्धा नियमितपणे ख्रिश्चन धर्माचे पालन करत नाही. जसजसा वेळ जातोय, तसतसे आयुष्य अधिकच विनोदी होत चालले आहे.
आमिर खानचे यापूर्वी रीना दत्ता आणि किरण राव यांच्याशी लग्न झाले होते. त्याला तीन मुले आहेत — रीनासोबतच्या पहिल्या लग्नापासून जुनैद खान आणि इरा खान, आणि किरण रावसोबतच्या लग्नापासून आझाद राव खान.
आमिर खानने अद्याप या धमक्यांवर कोणतीही प्रतिक्रिया दिलेली नाही.
