Marathi e-Batmya
Related Articles
काँग्रेसचे खासदार राहुल गांधी यांनी गुरुवारी मंचावर काँग्रेस नेते संदीप दीक्षित यांना मिठी मारून पंतप्रधान नरेंद्र मोदी यांनी इटलीच्या पंतप्रधान जॉर्जिया मेलोनी यांच्यासह परदेशी नेत्यांना दिलेल्या मिठीवर टीका केली.
रचनात्मक काँग्रेसच्या राष्ट्रीय अधिवेशनात बोलताना राहुल गांधी म्हणाले, “त्यांना (पंतप्रधान मोदींना) ही कल्पना कुठून सुचली हे मला माहीत नाही. लोकांच्या डोक्यात विचित्र कल्पना येतात. त्यांना वाटते की हे परराष्ट्र धोरण आहे, असे म्हणत त्यांनी दीक्षित यांना घट्ट मिठी मारली.
संदिप दीक्षित यांनी मिश्किलपणे विचारले, मी मेलोनी आहे असे समजून तुम्ही मला मिठी मारत नव्हता ना? त्यावर राहुल गांधी म्हणाले, मी अजून त्या टप्प्यावर पोहोचलो नाही, यावर उपस्थितांमध्ये हशा पिकला.
या मिठीमुळे राजकीय वाद निर्माण झाला असून, भाजपने राहुल गांधींवर “अपरिपक्व” टिप्पणी केल्याचा आरोप केला, तर काँग्रेसने राहुल गांधी यांचा बचाव करत म्हटले की त्यांनी मेलोनी यांचा नावाचा उल्लेखही केला नव्हता.
भाजपचे प्रवक्ते संजू वर्मा यांनी एका वृत्त वाहिनीला सांगितले की, राहुल गांधींचे वक्तव्य ‘निंदनीय, घृणास्पद’ असून ते विरोधी पक्षनेते किंवा पंतप्रधानपदाची आकांक्षा बाळगणाऱ्या व्यक्तीला ‘निश्चितच शोभणारे नाही’.
मात्र, काँग्रेसच्या प्रवक्त्या शमा मोहम्मद म्हणाल्या की, राहुल गांधींनी मेलोनींवर कोणताही टोमणा मारला नाही. राहुल गांधींनी मेलोनी हा शब्द वापरलेला नाही. राहुल गांधींनी त्यांना (संदीप दीक्षित) मिठी मारली. त्यात काहीही चुकीचे नाही, असे एका वृत्त वाहिनीला सांगितले.
शमा मोहम्मद यांनी पंतप्रधान मोदींच्या परदेशी नेत्यांसोबतच्या भेटीगाठींवरही टीका केली आणि त्यांच्या वारंवारच्या मिठी मारण्याच्या सवयीने आपल्याला ‘धक्का’ बसल्याचे सांगितले. “माझे लग्न एका परदेशी व्यक्तीशी झाले आहे. त्यांना मिठी मारलेली आवडत नाही. त्यांना हस्तांदोलन केलेले आवडते. जेव्हा ते तुमच्याशी परिचित होतात, तेव्हा ते मिठी मारतात किंवा चुंबन घेतात,” असे त्या म्हणाल्या.
या कार्यक्रमात राहुल गांधी यांनी भाजप आणि आरएसएसवर जोरदार हल्ला चढवला. त्यांना ‘जोकरांचा समूह’ आणि ‘विदूषक’ संबोधत, त्यांच्या मते, या दोन्हींना भारताचा इतिहास, संस्कृती किंवा सद्यस्थितीची काहीही समज नाही.
शमा मोहम्मद म्हणाल्या की, भाजप-आरएसएसचे राजकीय तत्त्वज्ञान हे भारतावर अशी व्यवस्था लादणे आहे, जी त्यांना आणि इतर काही विशिष्ट लोकांना फायदेशीर ठरेल, तर काँग्रेसला देशाला ‘स्वतःला व्यक्त करण्याची’ संधी द्यायची आहे.
शमा मोहम्मद पुढे म्हणाल्या, जंतर मंतरवर जे घडत होते ते तुम्ही पाहिले तर, विद्यार्थ्यांना स्वतःला व्यक्त करायचे होते, पण सरकारने सांगितले की ‘आम्हाला सुव्यवस्था हवी आहे आणि तुम्ही स्वतःला व्यक्त करू शकत नाही’.
राहुल गांधी म्हणाले की, राजकीय लढाई ही इतरांवर सुव्यवस्था लादू इच्छिणाऱ्यांमध्ये आणि लोकांना स्वतःला व्यक्त करण्याची संधी देऊ इच्छिणाऱ्यांमध्ये आहे.
LIVE: LoP Shri @RahulGandhi | Rachnatmak Congress National Convention | New Delhi https://t.co/lDUnDEsgvQ
— Congress (@INCIndia) August 13, 2026
रायबरेलीचे खासदार राहुल गांधी यांनी दावा केला की, आरएसएसने आपले मूळ स्वरूप गमावले आहे आणि ‘मोठ्या भांडवलदारांनी त्याला ताब्यात घेऊन त्याचा वापर केला आहे’. यासाठी त्यांनी उद्योगपती गौतम अदानी आणि मुकेश अंबानी यांची नावे घेतली.
“मूळ शक्ती म्हणून आरएसएस आता मृत झाली आहे, ती आता अस्तित्वात नाही. आता आरएसएस हे मोठ्या भांडवलदारांचे एक साधन बनले आहे. ते अदानींचे सेवक आहेत, जसे मोदी हे अदानींचे सेवक आहेत,” असा आरोप केला.
राहुल गांधी यांनी ठामपणे सांगितले की, आरएसएस मूळतः भारतातील लहान व्यावसायिकांच्या काही वर्गांचे प्रतिनिधित्व करत होती, परंतु गेल्या काही वर्षांत तिचे स्वरूप बदलले आहे.
विरोधी पक्षनेते राहुल गांधी यांनी या बदलाचा संबंध नोटाबंदीशी जोडला आणि आरोप केला की, आरएसएसने लहान व्यवसायांना नुकसान पोहोचवणाऱ्या धोरणांना हातभार लावला होता.
राहुल गांधी यांनी सरकारवर दबाव कायम ठेवण्याचा निर्धार व्यक्त केला आणि म्हणाले की, जोपर्यंत पंतप्रधान मोदी आणि गृहमंत्री अमित शाह राजीनामा देत नाहीत, तोपर्यंत त्यांना ‘झोपू’ दिले जाणार नाही.
“जोपर्यंत पंतप्रधान मोदी आणि अमित शाह राजीनामा देत नाहीत, तोपर्यंत त्यांना झोप लागणार नाही. आम्ही त्यांना जागे ठेवू,” असे ते म्हणाले.
राहुल गांधी यांनी यावर जोर दिला की, काँग्रेस आपली मोहीम कोणत्याही हिंसाचाराशिवाय किंवा द्वेषाशिवाय सुरू ठेवेल. “आम्ही हे द्वेष आणि हिंसेशिवाय करू. आम्ही आमच्या संस्कृतीसाठी लढत आहोत. आमचा देश द्वेषाचा नाही, तर प्रेम, बंधुत्व आणि अहिंसेचा आहे,” असे ते म्हणाले.
राहुल गांधी यांनी दावा केला की, आरएसएस आता एक मूळ शक्ती राहिलेली नाही आणि ज्या भारताशी एकेकाळी संबंध ठेवू इच्छित होती, त्याचे प्रतिनिधित्व ती आता करत नाही.
“तुम्ही ३,००० वर्षांपूर्वीचा भारत समजू शकत नाही, तुम्हाला आजचा भारत समजून घ्यावा लागेल. आजचा भारत समजून घेण्यासाठी, तुम्हाला त्याची अभिव्यक्ती समजून घ्यावी लागेल,” असे ते म्हणाले.
ते पुढे म्हणाले की, जरी आरएसएसने स्वतःची ‘छोटीशी व्यवस्था’ निर्माण करण्याचा प्रयत्न केला, तरी अखेरीस भारताच्या अभिव्यक्तीमुळे त्याला आव्हान दिले जाईल आणि ते मोडून काढले जाईल.
